"Hizb ut-Tahrir davası"niñ ekinci Bağçasaray gruppasınıñ mabüsi Oleğ Fedorovnı Lipetsk vilâyetiniñ Yelets şeerindeki 2-nci apishaneden etapqa alıp kettiler. Şu anda o, İjevsk SİZOnıñ tranzit noqtasında buluna, anda müstemlekege etapnı bekley.
Siyasiy mabüsniñ apayı İrına Fedorovağa esaslanıp Qırım birdemligi bunı bildirdi.
"O, boş aynıñ 18-nde saba apishaneden çıqarılğanını qorantasına bildirdi. Ertesi künü aqşam qırımtatar Saratov SİZOnıñ tranzit noqtasına keldi. Bundan soñ onı Kazanğa alıp kettiler ve taqiqat izolâtorı rejiminde çalışqan binada qaldırdılar", — dep bildirildi.
Hatırlatamız ki, 2021 senesi kiçik aynıñ 17-nde Bağçasarayda keçirilgen kütleviy tintüvler vaqtında iş adamları Oleğ (Ali) Fedorov ve Ernest İbragimov FSB hadimleri tarafından tutuldılar. Olarğa qarşı cinaiy dava açıldı, çünki cami içinde "Hizb ut-Tahrir davası"nıñ ekinci Bağçasaray gruppasınıñ iştirakçilerinen körüşken ediler.
2022 senesi oraq ayınıñ 8-nde Cenübiy bölgeniñ arbiy makemesi Fedorov ve İbragimovnı 13 senege apiske aldı.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
