"Ateş" arbiy-partizan areketi bildirdi ki, işğal etilgen Qırımnıñ Kezlev rayonını tedqiq etkende, Rusiye askerleri Keriç köprüni qoşma qorumaq içün tehnikasını ve ava mudafaası sistemalarını Keriç rayonına avuştırdılar.
Areket boş aynın 20-nde Telegram kanalında bunı bildirdi.
Partizanlarnıñ qayd etkenine köre, işğalcilerniñ böyle areketleri neticesinde uçaq tamir zavodı ve yanındaki ava limanı "aslında qoruvsız ve tehnikasız" qaldı. Hususan, olarnıñ malümatına köre, müessisede tek uçaq füzelâjları ve uçucısız aletlerge qarşılıq köstermek içün qullanıla bilecek eski "SU-23-2" top qurulışı qayd etile.
"Evel bu topraqta işğalciler arbiy aviatsiyasını yerleştirgen edi, soñra Ukraina mudafaa quvetleriniñ muvafaqiyetli ücümlerinden soñ olarnı başqa arbiy ava limanlarına dağıttılar. Biz bu ücümlerge faal sürette yardım ettik, operativ malümatnı berdik", — dep "Ateş" idarecileri qayd ettiler.
Hatırlatamız kş, "Ateş" areketi, işğal etilgen Aqyarnıñ Qamış ve Kozaça körfezlerini teşkergende, Rusiye Qara deñiz flotunıñ dalıcılar mektebi yanında "Pantsir S-1" ava mudafaası sistemasını taptı, dep bildirdi.
Jurnalist taqiqatları merkeziniñ malümatına köre, 2024 senesi orta küz ayınıñ 24-nden Keriç köprüniñ qoruv sistemasında yañı deñişmeler oldı. Hususan, onıñ ğarbiy qısmında Keriç tarafından metal "kirpiler" sızığı eki qat uzatıldı ve boş aynıñ ortasına qadar 1,5 km-ge yetti.
Telegram, WhatsApp ve Facebookta Suspilne Qırım haberlerine abune oluñız
