Advokat Rustem Kâmilyevni oña qarşı tizilgen eki "memuriy protokol"nı baqmaq içün Aqmescitniñ Kıyiv rayon makemesine alıp kettiler. Bundan evel, boş aynıñ 7-nde, onıñ ve daa bir advokat Lilâ Gemeciniñ evinde İşğalli Aşırıcılıqqa qarşılıq merkeziniñ (AQM) hadimleri tintüv keçirip, Kâmilevni yaqaladılar.
Bunı advokat Edem Semedlâyev "Qırım birdemligi" cemaat teşkilâtına bergen izaatında bildirdi.
İşğal etilgen Aqmescitniñ Kıyiv rayon makemesiniñ binası yanında Gemeci ve Kâmilevniñ tuvğanları ve siyasiy mabüslerniñ tuvğanları toplandılar, dep "Qırım birdemligi" bildirdi.
"Makeme" binasına, advokatlarnıñ bir qısmından ğayrı, kimseni yibermediler. "Makemeci"niñ yardımcısı Kurbedinovnı qaçırmadı. Mudafaa tarafı bunı adaletli makeme aqqınıñ bozuluvı dep saya.
Kurbedinovnıñ aytqanına köre, Kâmilev "makeme"de memuriy apis cezasını ala bile.
Aynı zamanda advokatnıñ qardaşı Süleyman Kâmilev işğalli politsniñ böyle areketleri adaletsiz olğanını bildirdi.
"O, dört balanıñ babası, yahşı bir aile başı, pek çoq insan tarafından tanınğan yahşı bir insandır", — dep apiske alınğan qardaşı aqqında tarif etti Süleyman.
Hatırlatamız ki, Ukraina prezidentiniñ QMCdeki temsilciligi boş aynıñ 7-nde Gemeci ve Kâmilevniñ evinde keçirilgen tintüvlerni takbih etti.
"Böyle sistemli areketler ve "çözümler" tek işğalciler tarafından siyasiy sebeplerden taqip etilgen şahıslarğa qol tutmaqnı eksiltmek, soy-soplarını, tuvğanları ya da semetdeşleriniñ aq-uquqları ve serbestligini qorçalağan ve işğalli akimiyetniñ areketlerini aydınlatqan jurnalist ve faalcilerni qorquzmaq içün yapıldı", — dep bildirildi.
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Telegram, WhatsApp ve Facebookta Suspilne Qırım haberlerine abune oluñız
