Qırımlı Yuriy ve Elmira Baranovlar bir aydır er kün ukrain parlamentiniñ divarları ögünde miting keçirip, esir alınğan ukrainalılarnıñ, olarnıñ arasında oğlu Ernest olğanını tüşüneler, azat etilmesini talap eteler.
O, Ukrainanıñ şarqında cenkleşken vaqıt ğayıp oldı, ana-babası ise, onıñ sağ olğanını ve Rusiye esirliginde olğanını tüşüneler. Suvuqlıq, yağmur ve yelge baqmadan, çift er kün sıcaq çay ketire ve oğlunıñ ve başqa esirlerniñ taqdirine destek ve diqqat bekley.
Ernestniñ ana-babası Suspilne Qırımnıñ intervyusında öz oğlu aqqında tarif ettiler.
"Er kün saat 6:30da turam: samovarlar, çaynikler. Saat sekizde endi andamız ve saat beşke qadar andamız. Yağmur yağa, yel esip tura — biz er alda turamız, çünki bizim oğlanlarımız içün esirlikte daa ağır", — dep ayttı Ernestniñ babası Yuriy Baranov.
Ana-babası oğlunen soñki sefer 2022 senesi bozarğan aynıñ 14-nde bağlanğan edi. Ertesi künü olarğa ğayıp olğanını bildirdiler. Asrekdeşleriniñ aytqanına köre, oğlan cenkleşkende yaralandı.
"Bozarğan aynıñ 15-nde aqayıma telefon etip, Ernestniñ cenhkleşkende ğayıp olğanını ayttılar. Asrekdeşleri onıñ yaralanğanını kördiler, lâkin toplu ateşler onıñ cesedini almağa imkân bermedi", — dep tarif etti Ernestniñ anası Elmira Baranova.
Ernest Baranovnıñ ğayıp oluvı resmen tanınsa da, ana-babası onıñ sağ olğanından ve esirlikte bulunğanından emin.
"Olar, böyle çatışmalar olğan olsa, Ernest öldürilgen olsa, onı alıp ketmezler, onı qaldırırlar, dep oğlanlar işandırdılar. Em de, tibbiy yardım kösterilgeni aqqında aytsaq, yüz fayız esirliktir", — dep añlattı Elmira.
Ernest Baranov Kefede doğdı ve balalıqtan berli Ukraina tarafdarı olğan edi. Qırım işğal etilgen soñ qorantası yarımadanı terk etti. Kıyivde Ernest, İvan Boğun adına arbiy litseyni bitirdi ve 2020 senesi USQnen añlaşma imzaladı. O, 503 ayrı deñiz piyade batalyonında — askerler "Borsuklar" dep adlandırğan bölükte hızmet ete edi.
"Yahşı bir foto çıqar", dedim. O, onı maña yolladı. Bu 503-ünci ayrı deñiz piyade batalyonı, "Borsuklar". "Borsuk" lağabınen Suharevskıynıñ komandanlığından başlap böyle adlandırıla ediler. O vaqıttan berli olar borsuqlar", — dep hatırladı Elmira hanım.
Ernestniñ babası Yuriy Baranov, oğlu ğayıp olğanından berli saqqalını tıraş etmedi.
"Başta er şey qolay edi, soñra ise: oğlumnı quçaqlamadan, tıraş olmaycağım, dep qarar berdim", — dey Yuriy.
Ernest ğayıp olğan soñ Elmira hanım işten çıqtı. Bundan soñ qavehanede çalışıp olamadı.
"Böyle bir meselenen oğraşqanda ve etrafta ayat devam etkende. Gençler ise raatlanalar, yüreler. İçki ve er şey ve muzıka olğan cemaat aşhanesini özüñiz añlaysıñız. Bu menim içün imkânsız edi", — dey qadın.
Ana-babası oğlunı qaytarmaq içün makemelerge bara, mitingler teşkil ete ve ümütlerini coymay. Orta küz ayınıñ başında Elmira Baranova, oğlu ve başqa esirlerge diqqat çekmek içün, atta Türkiyege kilse vekâletlisine qabul etüvge ve konsulnen körüşüvge bardı.
"İstanbulda miting keçirdik. Ernestniñ fotoresimini alıp, türk tilinde yazğan edi: 'Oğlum üç yıldır esirlikte'", — dey Elmira.
Bütün qıyınlıqlarğa baqmadan, Baranovlar qorantası er kün Ernestniñ azat etilmesi içün küreşeler, onıñ qaytacağına işanalar.
Telegram, WhatsApp ve Facebookta Suspilne Qırım haberlerine abune oluñız
