Ukraina prezidentiniñ QMCdeki Temsilciliginiñ "Serbest Qırımğa mektüpler" teşebbüsi çerçivesinde TNMK gruppasınıñ vokalisti Oleksandr "Fozzi" Sıdorenko Kezlevli siyasiy mabüs, ressam ve faalci Boğdan Zizanıñ mektübini oqudı. İşğalli akimiyeti onı umumiy rejimli müstemlekede 15 senege üküm etti.
Bunı Temsilcilik orta küz ayınıñ 22-nde Telegramda bildirdi.
Bugünde-bugün Boğdan Ziza Rusiyeniñ Vladimir şeerinde, Qırımdan biñlernen kilometr uzaqlığında yerleşken "Vladimir merkezi" apishanede tutula.
Temsilcilik teşebbüske qoşulmağa çağırdı.
"Mektüp yazıñız, dostlarıñızğa ve zenaatdaşlarıñızğa aktsiya aqqında haber beriñiz, içtimaiy ağlarda paylaşıñız. Bu adiy adımlar vatandaşlarımızğa, er angi maniağa baqmadan, olarnıñ serbestligi içün küreşkenimizni añlatmağa yardım etecek. Muqavemet devam ete!" - dep qayd etti Temsilcilik.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Telegram, WhatsApp ve Facebookta Suspilne Qırım haberlerine abune oluñız
