Ukraina prezidentiniñ Temsilciliginiñ "Serbest Qırımğa mektüpler" ARK teşebbüsi çerçivesinde "TNMK" ukrain taqımınıñ vokalisti Oleğ "Fagot" Mihaylüta Kezlevli siyasiy mabüs, ressam ve faalci Boğdan Zizanıñ mektübini oqudı. İşğalciler onı 15 yılğa umumiy rejimli müstemlekede apis cezasına maküm ettiler.
Temsilcilik orta küzniñ 11-nde Telegramda bunı bildirdi.
"Bugün Boüdan Ziza, Rusiye tarafından qanunsız olaraq maküm etilgen Ukraina vatandaşlarına diqqat celp etmek içün, Fagotnıñ sesinen seslene", — dep aytıla haberde.
Teşebbüs teşebbüske qoşulmağa çağırdı.
"Mektüp yazıñız, dostlarıñız ve işdeşleriñizge aktsiya aqqında haber beriñiz, içtimaiy ağlarda paylaşıñız. Bu adiy adımlar vatandaşlarımızğa, er angi maniağa baqmadan, olarnıñ serbestligi içün küreşkenimizni köstermege yardım etecek. Muqavemet devam ete!" — dep qayd etti Temsilcilik.
Hatırlatamız ki, al-azırda Boğdan Ziza Rusiye Federatsiyasınıñ Perm şeerindeki 29. tüzetüv müstemlekesinde buluna. Bundan evel qorantası onıñ evelleri bulunğan yerini bilmey edi.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Telegram, WhatsApp ve Facebookta Suspilne Qırım haberlerine abune oluñız
