Ukraina Yuqarı Şurasınıñ insan aqları vekâletlisi Dmıtro Lubinetsniñ bildirgenine köre, qanunsız olaraq maküm etilgen 218 qırım siyasiy mabüsiniñ eñ azından 41-i acele tibbiy yardımğa muhtac. Hususan, Rusiye quvetçileri tarafından sert rejimli müstemlekede 8,5 yıl üküm etilgen siyasiy mabüs Rustem Gugurıknıñ tibbiy yardımğa ihtiyacı bar.
Bunı Dmıtro Lubinets Telegram kanalında yazdı.
Onıñ aytqanına köre, Rusiye müstemlekelerinde qanunsız şekilde maküm etilgen 218 qırım siyasiy mabüsiniñ eñ azından 41-i acele tibbiy yardımğa muhtac. Olardan 31-i — qırımtatar halqınñ vekilidir.
"Daa bir kere qayd etem ki, Rusiye tarafından qanunsız olaraq apiske alınğan Ukraina vatandaşlarına qarşı insanlıqqa zıt munasebetler sistematiktir. Halqara toplulıq, qanunsız tutulğan Ukraina vatandaşlarınıñ deral azat etilmesi içün Rusiyege basqı yapmaq içün ğayretlerni quvetleştirmeli", — dep qayd etti Dmıtro Lubinets.
O şunı da qoştı ki, Rustem Gugurık Burât Ulusınıñ müstemlekesinde kerekli tibbiy yardımsız kritik vaziyette buluna. Onıñ ciddiy sağlıq meseleleri bar. Onıñ alı pek fenalaşa.
"Eşitüv qabiliyetini cıya, yürek ilâclarınıñ yetmemesi sebebinden nefes qıtlığı, aşqazan meseleleri, tiş tedaviylemek kerek. Rustemni "terroristler"ge ayırılğan baraqlarda tutalar, ve altı ay içinde üç kere ceza izolâtorına qapatqanlar. Bundan ğayrı, o, defalarca ruhiy ve bedeniy zulumğa oğratıla edi", — dep qayd etti Lubinets.
Telegram, WhatsApp ve Facebookta Suspilne Qırım haberlerine abune oluñız
