Siyasiy mabüs Rustem Gugurıknıñ sağlıq vaziyeti fenalaşa, hususan adamnıñ qalp işi toqtatıla. İşğalciler tarafından "Noman Çelebicihan adına batalyonda" iştirak etkeni içün sert rejimli müstemlekede 8,5 yılğa üküm etilgen qırımtatar adamı tibbiy yardımğa muhtac.
Suspilne Qırımğa onıñ apayı Viktoriya bunı añlattı.
Onıñ qayd etkenine köre, keçken afta Rustem Qırımdaki qız qardaşına "Zonatelek" telefon bağınen telefon etti. Maküm etilgen adam, oña paket yollamamağa rica etti, çünki o, sadece qısmını ala. Aynı zamanda, o, para yollamaq kerekligini bildirdi — bu paralarnen Gügirik tükânda kerekli şeyler ala bilecek.
Bundan da ğayrı, Kreml mabüsiniñ apayı aytqanı kibi, Rustemniñ nefes alması fenalaştı.
"Men bütün künler boyunca raatsızım. Olar telefon eteceklerini ve ne aytacaqlarını bilmeysiñ. Onıñ bu nefes alması pek kerginleşti. Bundan da ğayrı, köküs atında raatsızlıq ve yanma duyğanı belli oldı. Onıñ aytqanına köre, anda (apishanede — muar.) sıq-sıq qızartılğan balıq berile, amma oña bermeyler. Men oña aş pişirgende, çorbalarnı qızartmay ediler, çünki ekimler oña qızartılğan aşlarnı aşamamağa tevsiye etken ediler, tek pişirilgen ya da fırında pişirilgen aşlarnı aşamaq kerek", — dep Viktoriya añlattı.
Qadın şunı da qayd etti ki, tolu miqyaslı istilâdan evel o ve aqayı Hersonda teşkerüvden keçken ediler, amma onı bitirmediler ve ekimler oña diagnoz qoymadılar
"Onıñ yüregi bozulğan edi. Onıñ ekimi, onı baqıp çıqmaq içün, oña ilâclar berdi. Müstemlekede tedaviylenmey, bu sebebinden onıñ alı fenalaşa", — dep Viktoriya qayd etti.
Müstemlekede ekim Gügirikniñ qanını alıp, yüregi içün ultrasond çekti.
"Maña qalp hastalığı olğanını ayttılar. Ve başqa bir şey yoq", — dep Rustemnıñ apayı qayd etti.
Viktoriya qayd etti ki, olar siyasiy mabüslerniñ azat etilmesi aqqında akimiyetniñ diqqatını celp etmek içün aktsiyalarğa çıqmağa devam eteler.
"Men bellesem, olarnı eñ yaqın vaqıtta evlerine qaytarmaq kerek. Bu, birinciden, siyasiy mabüsler içün pek qıyın. Olar buña dayanıp olamazlar... Onıñ (Rustem Gugurıknıñ — muar.) büyük sağlıq meseleleri peyda oldı. Bundan evel de bar edi, amma müstemlekede endi üç yıldır olğanı içün, anda bulunmaq pek qıyın" ,— dep añlattı o.
Hatırlatamız ki, QMM 2024 senesiniñ 9 ayı devamında işğal etilgen Qırımda insan aqlarınıñ bozuluvı boyunca taliliniñ taqdiminde Rustem Gugurıknıñ tuvğanı Tetâna Lukyanenko, apiste Kreml mabüsiniñ ruhiy ve bedeniy zulumğa oğrağanını bildirdi.
Rustem Gugurık aqqında ne bilemiz
2022 senesi saban ayınıñ 27-nde FSB hadimleri onı Herson vilâyetiniñ Qırımnen memuriy sıñırında Çonğarda tuttılar.
Barışıq vaqtında çoq balalı qırımtatar adamı taksici olaraq çalışqan edi. O, insanlarnı Çongarğa alıp ketken edi. O künü, Rusiye istilâsı sebebinden, adam qorantasını Bağçasarayda tuvğanlarına alıp ketmege tırışa edi.
2016 senesi Rustem ve qardaşı Bekir Gugurık 2021 senesine qadar işğal etilgen Qırımğa kiriş yasağı aqqında haber aldılar.
Saban ayınıñ 31-nde belli oldı ki, Rusiye kontrolindeki Aqmescitniñ Kıyiv rayon makemesi Rustem Gugurıknı "Noman Çelebicihan adına göñülli batalyonda" iştirak etkeninden şübeli sayılıp, eki ayğa apiske aldı.
2022 senesi orta küz ayında Aqmescitniñ işğalli Kıyiv rayon makemesi Gugurıknı "Noman Çelebicihan adına batalyon"da iştirak etkeni içün müstemlekede 8,5 yılğa üküm etti.
Rusiye Ceza qanunnamesiniñ 208-inci maddesiniñ 2-nci qısmına binaen ("federal qanunğa uymağan silâlı birleşmede iştirak etüv") Aqmescitniñ Kıyiv rayon makemesiniñ "makemecisi" Olga Kuznetsova üküm çıqardı.
Telegram, WhatsApp ve Facebookta Suspilne Qırım haberlerine abune oluñız
