Halqara toplulıq Rusiye tecavuzına qarşılıq köstermek içün ğayretini arttırmalı, çünki tek birlik, qararı ve arbiy küç tecavuzcını halqara uquqqa uymağa mecbur ete bile. Ukraina ve qırımtatar halqlarınıñ vatanı olğan Qırımnıñ ayırılmaz qısmı olğan topraqlarnen ticaret yapmamaq müimdir.
Bunı Qırımtatar Milliy Meclisiniñ reisi Refat Çubarov orta küz ayınıñ 24-nde Rığa şeerinde olıp keçken Qırım platformasınıñ üçünci parlament sammitinde bildirdi.
"Ukrainlar, qırımtatarlar ve bütün Ukraina vatandaşlarınıñ acısını öz acısı kibi qabul etkeniñiz, demokratik qıymetlerni paylaşqanıñız ve toprağımızğa Rusiye istilâsını qabul etmegeniñiz içün sizge minnetdarmız. Amma Rusiye tecavuzına qarşı ğayretlerni quvetleştirmek kerek", — dep qayd etti Çubarov.
O qayd etti ki, halqara toplulıqnıñ ciddiy cevabı kerek. Onıñ fikrince, Rusiyeni halqara uquq, gumanitar uquq ve insan aqları qaidelerine riayet etmege mecbur etmek içün yalıñız birlik ve arbiy küç kerek.
"Biz farqlı variantlarnı muzakere ete bilemiz, amma bir şeyni bilemiz — yalıñız birligimiz, azametimiz ve arbiy küçümiz Rusiye istilâcısını ve Ukrainanıñ işğal etilgen qısımlarından kelgen ordularnı halqara uquq, gumanitar uquq, insan aqları qaidelerine ve printsiplerine riayet etmege mecbur ete bile. Barışıq adaletli olmalı", — dep qayd etti o.
Meclisniñ reisi, Ukrainanıñ ayırılmaz bir qısmı olğan ve qırımtatar halqınıñ vatanı olğan Qırım meselesine ayrı diqqat ayırdı. Çubarov qayd etti ki, ukrain devleti öz topraqları boyunca uzlaşmağa azır degil, ve er angi uzlaşuv Rusiye tarafından daa büyük tecavuzğa ketire bile.
"Biz bu barışıq içün er angi fiyatnı ödemege azır degilmiz, biz topraqlarımıznı, şu cümleden, Rusiyeniñ başqa memleketlerge qarşı tecavuzını kenişletmek içün arbiy meydanğa çevirilgen qırımtatar halqınıñ vatanı olğan Qırımnı satmaymız. Şunıñ içün biz barışıq içün öz ğayretimizni istilâcılarnı tınçlandırmağa çevirmemek kerekmiz", — dep qayd etti o.
Sammitniñ neticesi, devletlerniñ liderleri Ukrainanıñ özüni mudafaa etmek ve vaqtınca işğal etilgen topraqlarnı azat etmek aqqını tasdıqlağan umumiy beyanatnıñ qabul etilmesi oldı. Vesiqada Rusiyeniñ halqara uquqnı ve Ukrainanıñ topraq bütünligini bozğan qanunsız areketleri de takbih etile.
Hatırlatamız ki, Suspilne Qırım taqımı Qırım platformasınıñ üçünci parlament sammitiniñ esas beyanatlarını topladı.
Qırım platforması — Ukraina tarafından Qırım meselesini kün tertibine qaytarmaq, insan aqlarını qorçalamaq, yarımadanıñ işğalden azat etilmesine yardım etmek, Avropa ve global havfsızlıqnı pekitmek içün teşebbüs etilgen halqara idare mehanizmidir.
Telegram, WhatsApp ve Facebookta Suspilne Qırım haberlerine abune oluñız
