Bugün, bozarğan aynıñ 11. künü, Aqmescitteki işğalli Cenübiy bölge arbiy makemesi, "Hizb ut-Tahrir davası"nıñ beşinci Bağçasaray gruppasınıñ imayeci tarafınıñ rica etkenini red etti ve qorçalayıcı tedbiriniñ müddetini altı ayğa uzattı. 2024 senesi bozarğan aynıñ 24. künü kelecek oturış olacaq.
Advokat Emil Kurbedinov "Qırım birdemligi"ne bu aqqında haber berdi.
Remzi Nimetulaev, Eldar Yakubov, Abdulmecit Seitumerov, Amethan Umerov, Ruslan Asanov ve Seidamet Mustafaev aqqında laf etemiz.
"Bu davanıñ ne içün prokuror tarafından yañıdan baqılmaq kerekligini tafsilâtlıca isbat ettik. Qarar bermek içün mümkün olmağan bazı eksikliklerni tüzetmek maqsadınen", — uquq qorçalayıcı qayd etti.
Kurbedinov qayd etti ki, imayeci tarafnıñ delillerine baqmadan, makeme qorçalayıcı tedbirniñ müddetini altı ayğa, yani boş aynın 24. kününe qadar, uzattı ve Cenübiy bölge arbiy makemesinde yañı oturışnı bozarğan aynıñ 24. künü saat 10:00da keçirmege ilân etti.
"Men bellesem, qabaatlanğan adamlar bu tarihqa kelip yetemezler", — Kurbedinov qoştı.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
