İşğal etilgen Qırımda Rusiye uquq qorçalayıcıları Rusiyede yasaq etilgen "Yehova şaatları" diniy teşkilâtınıñ Keriç merkeziniñ reberini tuttı. Adamğa qarşı "yasaqlanğan diniy teşkilâtnıñ faaliyetini meydanğa ketirgeniRF CQniñ 282.2. maddesiniñ 1. qısmı"nde qabaatlav boyunca "cinayet davası" açıldı.
Qırım ve Aqyarnıñ işğalli taqiqat eyyeti Telegram kanalında bunı bildirdi.
Olar bildirgenleri kibi, davanıñ "iştirakçisi" 53 yaşında Keriç sakini oldı. O, Rusiye Federatsiyası 2017 senesi "Yehova şaatları" diniy teşkilâtınıñ faaliyeti yasaqlanğan soñ, rayon merkezinde ibadetlerni keçirmege devam etti.
Erkekni Rusiye Federal havfsızlıq hızmeti ve İçki işler nazirliginiñ hadimleri tuttılar. Rosgvardiyacılar olarğa bu esnasda yardım etken ediler.
"Yaşağanı ve toplaşuv yerleri tintilgende yasaq etilgen edebiyat ve başqa qanunsız şeyler tutıp alındı. Yasaqlanğan teşkilâtnıñ Keriç merkezindeki faaliyetine başqa şahıslarnıñ alâqası belgilene", — dep bildirildi.
"Yehova şatları"nıñ cinaiy taqip etilüvi aqqında ne bilemiz
2017 senesi Rusiye bu diniy teşkilâtnı ekstremist olaraq tanıdı ve onıñ faaliyetini, şu cümleden işğal etilgen Qırımda da, yasaq etti. 2018 senesinde ise, "Yehova şaatları"nıñ taqip etilüvi cinaiy davalar çerçivesinde başladı. Avropa insan aqları makemesi (AİAM) Rusiye ve işğal etilgen Qırımda "Yehova şaatları" teşkilâtınıñ yasağını qanunsız dep tanıdı.
"Yehova şaatları"nıñ resmiy saytında berilgen malümatqa köre, 2024 senesi arman ayına qadar Qırımda bu diniy teşkilâtnıñ doquz vekili apiske alındı.
Qayd etemiz ki, yarın, orta küz ayınıñ 15-nde, Suspilne Qırımnıñ Youtube kanalında "Din nezaret altında. Yehova Şaatları" bölümi yayınlanacaq. Biz Qırımdaki diniy teşkilâtnıñ taqip etilüvi aqqında tarif etecekmiz. Birinci bölümde mustaqil musulman cemiyetleriniñ taqip etilüvi aqqında, ekincisinde ise işğal etilgen pravoslav dini aqqında añlattıq.
Hatırlatamız ki, 2014 senesi Rusiyeniñ işğalinden evel Qırımda 49 ukrain din cemiyeti bar edi, amma 2024 senesi iç biri qalmadı.
Telegram, WhatsApp ve Facebookta Suspilne Qırım haberlerine abune oluñız
