Qırım siyasiy mabüsleri Leniye Umerova ve Nariman Celâlnıñ deñişmesi, işğalciler tarafından 15 senege maküm etilgen Kezlevli siyasiy mabüs, ressam ve faalci Boğdan Zizanıñ qız qardaşı Oleksandra Barkovağa azatlıqqa çıqmağa ümüt bere. O, azat etilgen Kreml mabüsleriniñ qorantaları içün quvanır ve qardaşınıñ qaytacağını bekley.
Barkova Suspilne Qırımğa apiske alınğan qardaşınıñ vaziyetini tarif etti. O, ayda bir kere, eki afta içinde bir tarafqa ketken ve sert tsenzurağa oğrağan mektüplernen bağlana.
"Bunı nasıl añlatmaq mümkün olğanını bilmeyim, amma bu kerçekten ruhnı kötere. Ve er şey mümkün olacağını añlaysıñ. Amma, başqa taraftan, añlaysıñ ki, bu yaqın vaqıtta ola bilir, ya da pek yaqın zamanda olamaz. Vaziyet alâ daa eñ qıyın derecede olğanı içün, siyasiy mabüslerni deñiştirüv ceryanınıñ şimdi başlağanınıñ açıq sebeplerini alâ daa añlamaymız. Belki olar noqtalıdır, belki de bu muntazam bir esnasqa keçmez", — dep Oleksandra Barkova qayd etti.
Kreml mabüsiniñ qız qardaşınıñ aytqanı kibi, devam etken cenk vaqtında deñişimlerniñ prioritetleri — askerlerdir. Amma o, ukrainler ve akimiyet siyasiy mabüslerni añlamalılar ve unutmamalılar, dep tüşüne.
"Olar aynı şu işkencege oğraylar. Ve bu bizim insanlarımız, olar içün küreşmek kerekmiz", — dep Barkova qoştı.
O, keçenlerde qardaşından mektüp alğanını bildirdi. O, bütün siyasiy mabüslerniñ azat etilmesini talap etip, keçken sene ilân etken açlıqtan soñ yañıdan başlağanını ayttı. Şimdi Zizanıñ sağlıq vaziyeti eyileşti.
"Pek bahtlım ki, sağlıq vaziyeti yahşı. Men bunı onıñ genç ve sağlam olğanına bağlayım. Amma soñki mektübinde, açlıqtan soñ biraz tüzelgenini, aş normal aşağanını yazdı. Duyğulı alı biraz yahşılaşqanı körüne, çünki o da sportnen oğraşa ve başqa faaliyetlerge qoşula. Onıñ sağlığı yahşı, Allaha şükür. Elbette, böyle devam etecegini ümüt etemiz, çünki Rusiye apishanelerinde hastalar olsa, bu tek bir yol biletidir", — dep Barkova qayd etti.
Boğdan Zizanıñ Rusiyeniñ "Vladimir merkezi" apishanesinde tutuluv şaraitini tarif etip, qadın, anda yañğız olmağanını bildirdi.
"Umumen böyle ola: bir kere üküm çıqarılğan soñ ve insan Rusiyeniñ bir apishanesinde bulunğan soñ, şarait biraz stabilleşe. Yani, Aqmescitte onıñ aynı şartları bar edi, soñra Rostovda onı kartserge qapattılar, soñra etap pek qıyın edi", — dep siyasiy mabüsniñ qardaşı añlattı.
Amma, onıñ aytqanına köre, apishanede aş sade, suv ise Kreml mabüsi içün künde bir kere berile.
"Yahşı bir şey yoq. Em de aş pek yaramay seviyede qaldı. Bu sebepten o, açlıqtan soñ pek çoq vaqıt devamında sağlamlıq seviyesine qayta edi. Çünki, esasen, bu vaziyetten çıqmaq içün şarait yoq. Suvnı künde bir kere içeler. Bu işkence usullarından biridir. Men bellesem, bu saylavlı bir şey (künde bir kere suv — mua.), bir şey "ögretmek içün", — dep Barkova tüşüne.
Qırımlı qadın, qardaşına mektüplerni başqa memleketlerden ve farqlı adamlardan yollay, çünki şimdi Kıyivde buluna.
"Misal içün, siyasiy mabüslerniñ tuvğanları Ukrainada bulunsalar, mektüpler olmaz, bir şey olmaz. Tek bir qaç teşkilât, bir qaç el çarpışuvınen bir şey ola bilir. İç bir şeyni añlatıp olamadıq. Faqat, mektüplernen yardım etkenler, paketlerni teslim etkenler, para sayğanlar. Bizim qollarımız bağlıdır. Mektüplerimizde qaydan yazılğanını, şeerlerniñ adlarını añlatmamağa tırışamız, mektüp tsenzuranı keçsin dep, çünki olar içün bu "triger"dir", — dep ayttı o.
Barkovnıñ aytqanına köre, Boğdan Zizanıñ adliyecisi işğal etilgen Qırımda buluna ve siyasiy mabüsni çoqtan körmedi. Aynı zamanda Boğdanğa cemaat teşkilâtlarınıñ advokatları keleler. Apiske alınğannıñ qardaşı dey ki, makeme oturışından soñ advokatnıñ rolü pek müim degil. Amma onıñ barlığı siyasiy mabüsniñ vaziyetini añlamaq içün kerek.
"Çünki Boğdannı bir kere bile makeme oturışlarını çekmege izin bermediler, jurnalistlerni kirsetmediler. Nariman Celâl ve Ahtem qardaşlarınıñ makemelerinden fotolarnı kördik, İrına Danılovıç ve başqalarnıñ makeme oturışlarından fotolarnı kördik. Soñra bilgenimiz kibi, Boğdannıñ bedeninde siyarıntılar ve işkence izleri bar edi. Bu sebepten onıñ fotolarını çekmege kimse izin bermedi. Bu sebepniñ nazariyelerinden biridir", — dep añlattı o.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Telegram ve Facebookta Suspilne Qırım haberlerine abune oluñız