Qırımnıñ işğalli Qurman rayon makemesi, 13 yılğa maküm etilgen siyasiy mabüs Arsen Abhayırovnı evine yaqınlaştırmaq içün Rusiye Federal Cezalandıruv hızmetiniñ (FCH) rednamesini qanunsız tanıdı. Şimdi o, Burât Cumhuriyetiniñ 8. apishanesinde buluna. Qırımtatar adamı "Hizb ut-Tahrir davası"nıñ Qurman gruppasınıñ iştirakçisidir.
"Qırım birdemligi"ne advokat Nazim Şeyhmambetov bu aqqında haber berdi.
Oturış vaqtında işğalli makeme Qırım ve oña yaqın vilâyetlerde yerleşken müstemlekeler aqqında malümat soradı. Uquq qorçalayıcılar yarımadada, Rostov vilâyetinde, Adigey cumhuriyetinde ve Stavropol bölgesinde tüzetüv müessiselerinde boş yerler aqqında malümat berdiler.
Adliyeciniñ aytqanına köre, Burât Cumhuriyetinden Qırımğa qadar 7 biñ kilometr mesafe olğanı içün siyasiy mabüs ve onıñ tuvğanları bağ tutmaq imkânından marum qaldılar.
"Ailesiniñ qazanğanı para, yolculıq içün ayırmağa yetmey. Abhayırovnıñ ailesi içün bir yolculıq tahminen 300-350 biñ ruble masraftır. Bu, iç te qabul etilmez bir yüktir. Bir aftalıq yol — uçaqnen yapılğan marşrutnı esaplasaq", — dep qayd etti Nazim Şeyhmambetov.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Hatırlatamız ki, siyasiy mabüs Arsen Abhayırov ayaqlarında qan damarlarınıñ varikozını çıqarmaq içün ameliyatqa ihtiyac duya.
Telegram ve Facebookta Suspilne Qırım haberlerine abune oluñız
