"Hizb ut-Tahrir davası"nıñ Qurman gruppasınıñ iştirakçisi Arsen Abhayirovnıñ ayaqlarında qan damarlarınıñ varikozını çıqarmaq içün ameliyat kerek.
Bunı "Qırım birdemligi" siyasiy mabüsniñ advokatına esaslanıp bildirdi.
Uquq qorçalayıcı Abhayirovnı Buryatistandaki Rusiye müstemlekesinde ziyaret etti.
Bir mabüs, keçken seneniñ mayıs ayından berli ayaqlarında varikoz bar olğanını ayttı. O, ameliyatqa muhtac, amma müstemlekede ameliyattan soñ daa çoq vaqıt keçe.
Abhayirov, Buryatiyadaki müstemlekede memuriyet ve başqa mabüslernen tarafsız munasebetler qurğanını da qoştı.
Hatırlatamız ki, Qırım iş adamı, "Hizb ut-Tahrir davası"nda Qurman gruppasınıñ mabüsi, 13 senege üküm etilgen Arsen Abhayirov, Krasnoyarsk vilâyetiniñ Yeniseysk apishanesinden Buryatistandaki sert rejimli müstemlekege etap etildi.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
