Qırımdaki 40tan çoq ukrain siyasiy mabüsi acele tibbiy yardımğa muhtac, lâkin olarnıñ aqları bozulğanı içün bu yardım berilmey.
Qırım MC ve Aqyar şeeriniñ sakinleriniñ aqları vekâletlisiniñ temsilcisi Elvin Kadırov Qırım platformasınıñ Dörtünci sammitinde "Qırım ve barışıq formulası: gumanitar tarafı" adlı munaqaşa vaqtında bunı bildirdi.
"Bu adamlar qanunsız apis müddetlerini saymaylar, ayat müddetlerini sayıp oturalar. Siyasiy mabüslerge tibbiy yardım kösterilmey, olar itibar ve insan munasebetine aqqından marum etile", — dep qayd etti o.
O, bir qaç siyasiy mabüsniñ sağlıq vaziyetine diqqat ayırdı, şu cümleden, Rusiye apishanesinde 40 kg azğan ve mustaqil tibbiy eyyet tarafından hastalığı ömürge keçirmeycegini tasdıqlağan Tofik Abdulgaziyevniñ sağlıq vaziyetine diqqat ayırdı. Kadırov, başqa ağır hasta siyasiy mabüsler arasında Amet Suleymanov ve İruna Danulovuçnı añdı.
İşğal etilgen Qırımda qanunsız olaraq maküm etilgen 219 Ukraina vatandaşı tutula, olardan 133ü — qırımtatar halqınıñ vekilleri. Bunı Qırım platformasınıñ sammitinde Yuqarı Şuranıñ insan aqları vekâletlisi Dmıtro Lubinets qayd etti. Onıñ aytqanına köre, işğalli akimiyet narazılıq aktsiyalarınıñ keçirilüvi, Rusiye ordusına askerlikke çağırılmaqtan vazgeçüv, "SVO"ğa qarşılıq kösterüv ve başqa uydurılğan sebeplerden sahte qabaatlavlar yapa.
Hatırlatamız ki, oraq ayında Qırımtatar Maaliy Merkezi, Qırımnıñ işğali başlağanından berli 334 siyasiy mabüs ve cinaiy davalar boyunca taqip etilgen şahıs qayd etilgenini bildirdi. olardan 217-si qırımtatardır.
Telegram ve Facebookta Suspilne Qırım haberlerine abune oluñız
