Berim ayınıñ 3-nde Ukraina Yuqarı Şurası Qırım Muhtar Cumhuriyeti ve Aqyar şeerini işğalden azat ve reintegratsiya etmege dair Ukraina devlet siyasetiniñ deñişmemesi aqqında arizanı qabul etmege qarar aldı.
Ukraina prezidentiniñ Qırım Muhtar Cumhuriyetindeki temsilciligi bunı bildire.
"Böylece, Ukraina prezidenti Volodımır Zelenskıynıñ Barışıq formulasınıñ amelge keçirilmesi neticesinde Rusiye istilâsı toqtatılmalı, Ukrainanıñ vaqtınca işğal etilgen bütün topraqları işğalden azat etilmeli, Azaq-Qara deñiz bölgesinde halqara grajdan gemileriniñ qatnavı ğayrıdan tiklenmeli, silâlı çatışmalarnıñ ögüni almaq ve Ukrainada ve dünyada barışıqqa telükelerni yoq etmek kerek" – dep bildirildi.
Arizada vatandaş ve arbiy esirlerniñ, hususan vaqtınca işğal etilgen Qırım topraqlarında zapt etilgenlerniñ azat etilmesi meselesine ayrı diqqat ayırıla.
Arizağa binaen, işğalden azat etilecek soñ yarımadanıñ reintegratsiyası, şu cümleden, keçici adalet printsipleri ve tarihiy-medeniy mirasnıñ ğayrıdan tiklenmesi devlet siyasetiniñ prioritetleri olacaq. Hususan, milliy kimliginiñ saqlanuvı ve Ukrainağa qarşı yapılğan cinayetlerge tarihiy adaletniñ tiklenilmesine, hususan 1944 senesi qırımtatar halqınıñ sürgünligine diqqat ayırıla.
Temsilcilik qayd etti ki, bu Arizanıñ qabul etilmesi Halqara Qırım platformasınıñ nevbetteki sammiti arfesinde müimdir.
Hatırlatamız ki, Yuqarı Şura Qırımda arbiy memuriyetlerniñ teşkil etilmesini közde tutqan qanun leyhasını qabul etti. Daimiy temsilci Tamila Taşeva qayd etti ki, qanun leyhasınıñ qabul etilmesi işğalden azat etilecek yarımadada devlet organlarınıñ faaliyetini ğayrıdan tiklemek içün müim bir adımdır.
Telegram ve Facebookta Suspilne Qırım haberlerine abune oluñız
