"Serbest Qırımğa mektüpler" teşebbüsi çerçivesinde Maşa Yefrosinina siyasiy mabüs ve cemaat jurnalisti Amet Süleymanovnıñ mektübini oqudı. İşğalciler oña qanunsız şekilde 12 senege maküm ettiler.
Prezidentniñ Qırım Muhtar Cumhuriyetindeki Temsilciligi Telegramda bu aqqında haber etti.
Temsilcilik hatırlattı ki, 2020 senesi saban ayınıñ 11-nde Süleymanovnıñ evi tintildi, faalci apiske alındı. 2021 senesi Rusiye makemesi Amet Süleymanovnı maküm etti. Adam, sağlıq vaziyeti sebebinden üç sene ev apsinde bulunğan edi. 2023 senesi çiçek ayınıñ 6-nda Amet Süleymanovnı apiske alıp, izolâtorğa kettiler.
Şu anda Amet Süleymanov Rusiyeniñ Vladimir vilâyetinde apiste buluna. Jurnalistniñ qan damarı ve mitral yürek yetersizligi bar. Temsilcilik hatırlattı ki, 2024 senesi mart ayında Rusiye makemesi Amet Süleymanovnıñ hastalıqları apiste tutuv şaraitine uymağanına baqmadan, onı azat etmege red etti.
Bundan da ğayrı, adamğa acele yürek klapanını deñiştirüv ameliyatı kerek.
"Serbest Qırımğa mektüpler" teşebbüsine qoşulıñız. Mektüp yazıñız, dostlarıñız ve işdeşleriñizge aktsiya aqqında haber beriñiz, içtimaiy ağlarda paylaşıñız. Bu qolay adımlar vatandaşlarımızğa, bütün manialarğa baqmadan, olarnıñ serbestligi içün küreşkenimizni añlatmağa yardım etecek", — dep Temsilcilik qayd etti.
Nasıl qatılmaq mümkün?
— Ukraina Prezidentiniñ Qırım MCdeki Temsiliniñ saytında siyasiy mabüsler cedveli ve olarnıñ tevqif etilgeni yerlerinen haritağa baqıñız.
— Mektüp yazıñız: adıñız, özüñiz aqqında bir şey ve ne içün yazmağa qarar alğanıñıznı yazıñız. Etrafıñızda, dünyada ne olğanını, filmler, kitaplar, seyaatlar, vaqialar iş aqqında bir şey yazıñız. Duyğulı ve külkünçli ikâyelerni añlatıñız, fikirleriñiznen paylaşıñız.
ZMINAnıñ saytında mektüplerni yazuv qaidelerinen tafsilâtlıca tanış olmaq mümkün.
Siziñ içün uyğun vastanen mektüp yollañız
Poçta adresi (mektüpni yollağan insan para ödey):
- İnsan aqları aqqında malümat merkezi, a/s V-539, Kıyiv ş., 01001.
- Email: [email protected].
Hatırlatamız ki, Rusiye tarafından qanunsız olaraq tutulğan siyasiy mabüslerge qol tutumaq içün teşkil etilgen "Serbest Qırımğa mektüpler" aktsiyası, 2024 senesiniñ soñuna qadar uzatıldı.
Amet Süleymanov aqqında ne bilemiz
Süleymanov – 2014 senesi Rusiyeniñ Qırımnı qanunsız işğalinden soñ evlerniñ tintilmeleri ve qırımtatarlarnıñ tutulmaları aqqında haber bergen "Qırım birdemligi" içtimaiy jurnalistidir.
O, qalpnıñ qırmızı qan damarı ve mitral kemligini çeke. Siyasiy mabüsniñ apayı Lilâ haber berdi ki, aqayı operatsiya nevbetinde tura. Bundan ğayrı, o qayd etti ki, onıñ içün apishanede bulunmaq, "ölüm demektir".
Bundan ğayrı, qırımtatarnıñ saqatlığı bar, amma 2015 senesi Moskvada ameliyattan red etkeni sebebinden o lâğu etildi, çünki muntazam tarzda teddaviylegeni Kıyivde ameliyat yapacaq edi.
2020 senesi saban ayınıñ 11-inde işğal etilgen Qırımnıñ Bağçasaray şeerinde rus quvetçileri, evini tinttiler ve neticesinde o tutuldı. 2023 senesi çiçek ayınıñ 5-ine qadar Süyelmanov, qalp hastalığı sebebinden, ev tevkifi astında buluna edi.
Qorçalayıcı tarafnıñ qırımtatarnıñ sağlıq alına dair çoq ilânlarına baqmadan, Rovtov-na-Donudaki Cenübiy bölge arbiy makemesi onı 12 senege maküm etmege qarar berdi.
Avropa Şurasınıñ Parlament Assambleyasınıñ (AŞPA) maruzacısı, rusiye akimiyetini qanunsız olaraq tevqif etilgen jurnalist Amet Süleymanovnı azat etmege çağırdı.
Telegram ve Facebookta Suspilne Qırım haberlerine abune oluñız
