Ukraina ve başqa ülkelerde "Serbest Qırımğa mektüpler" aktsiyası başlandı

Ukraina ve başqa ülkelerde "Serbest Qırımğa mektüpler" aktsiyası başlandı

Ексклюзивно
Ukraina ve başqa ülkelerde "Serbest Qırımğa mektüpler" aktsiyası başlandı
"Serbest Qırımğa mektüpler" teşebbüsi. Фото: Суспільне Крим

Ukrainalılar ve dünaynı, Rusiye tarafından qanunsız olaraq tutulıp tevqif etilgen siyasiy mabüslerini destek etmege çağırmaq içün Ukraina ve başqa ülkelerde "Serbest Qırımğa mektüpler" aktsiyası başlandı.

Ukraina-Ukrinform Media merkezinde Kreml reinelerini destek etici teşebbüsniñ açılışı vaqtında mütehassıslar bunı bildirdiler, dep Suspilne Qırım mühbirleri haber berdiler.

Prezidentniñ Qırım MCdeki Temsiliniñ "Qırım platforması"nıñ faaliyetini temin etici hızmetiniñ baş mesleatçısı Anna Sıtnikova añlattı ki, bu teşebbüs, cemaatnıñ ukrain reineleriniñ şartlarına nezaret etkenini rus apishaneleriniñ memuriyetlerine kösterecek.

"Olarğa selâm bermek, nasıl yaşayanlarını soramaq. Ve bu insanlar içün bu, soñ derecede müim bir añdır, çünki siyasiy mabüslerniñ ailelerinen çoq kere körüştik, laf etemiz ve olar aytalar ki, rus apishanelerinde, işğal etilgen Qırımdaki apishanelerde tevqif etilgen siyasiy mabüsler içün şu mektüpler, serbestlik daqqasıdır", — dep Sıtnikova qayd etti.

Şimdi 208 qırım siyasiy mabüsniñ olağanını bilemiz, olardan 125-i qırımtatarlardır. Şu cümleden, insanlarnı rus ordusını "itibardan tüşürmege" qabaatlaylar. Amma bundan ğayrı, işğalciler ukrain taraflı nazar noqtasını de qayd eteler.

"Bazıları "Çernova kalına" yırlay ediler, bazıları "Slava Ukraini" dep bağırdılar, bazıları Putinniñ portretini kestiler. Er bir insan, çeşit-türlü şekilde qarşılığını köstere. Anda insanlarnıñ mucadele etkenleriniñ ve bizim de er biri içün aynı şekilde mucadele etmek kereligimizniñ soñ derecede müim bir signalıdır. Olanı hatıralamaq ve olar aqqında añlatmaq müimdir", — dep Sıtnikova bildirdi.

Ukraina ve başqa ülkelerde "Serbest Qırımğa mektüpler" aktsiyası başlandı
Kreml reinelerini destek etici "Serbest Qırımğa mektüpler" teşebbüsi. Фото: Суспільне Крим

"Serbest Qırımğa mektüpler" aktsiyası 4 ay, kiçik aynıñ 19-ından başlap mayıs ayınıñ 19-ına qadar devam etecek. Ve bu, er bir insannıñ siyasiy mabüslerge yardım ete bilecegi eñ qolay şeydir, dep ZMINA İnsan aqları merkeziniñ leyhalar reberi Viktoriya Nesterenko bildirdi.

"Apishanelerde ve işğal etilgen Qırımda, Rusiyede siyasiy mabsüler şiddetli şartlarda bulunsalar bile, mektüp alıp, olar añlarlar ki, insanlar ve cemaat olarnı, tevqif etilmeden evel köstergenleri qarşılığını unutmadılar", — dep Nesterenko qayd etti.

Aynı zamanda uquq qorçalayıcılar, yaza bileyecegiñiz siyasiy mabüsler cedvelini yayınladı Cedvelde insanlar çoq degil, çünki reineniñ qayd olğanını ögrenmek pek zor. Bazı talaplarğa riayet etmek kerek. Şu cümleden, rus tilinde yazmaq (bunı apishane tsenzurası talap ete) ve siyasiyetnen bağlı nazar noqtasını bildirmemek kerek.

"Bugün körgeniñizni, insannen paylaşmağa istegeniñizni añlatmaq mümkün, bu insannı destek etmek içün resimlerni ve sevgeniñiz şeylerni bile yollamaq mümkün", — dep Anna Sıtnikova bildirdi.

"Serbest Qırımğa mektüp"ni em Prezidentniñ Qırım MCdeki temsiliniñ elektron poçtasına, em de ZMINA İnsan aqları merkeziniñ poçtasına online şekilde yollamaq mümkün. Siyasiy mabüsler içün meküplerni alacaq öz yerlerini teklif etken Qırım evi, Ukrain PEN ve Ukrainanıñ vaqtınca işğal etilgen topraqlarınıñ reintegratsiya meseleleri nazirligi bu aktsiyağa qatılacaqlar.

Ukraina ve başqa ülkelerde "Serbest Qırımğa mektüpler" aktsiyası başlandı
Yaza bileyecegiñiz siyasiy mabüsler cedveli. Фото: Суспільне Крим

"Vastasız da yaza bilesiñiz, çünki ayrıca Qırım SİZOda siyasiy mabüsler bir kamerada 10-15eş insan buluna ve bir siyasiy mabüs mektüp alsa da, olar onı beraber oqurlar", – dep Vikrotiya Nesterenko hulâsa çıqardı.

Keçken sene kitap forumında uquq qorçalayıcılar, Kreml reineleri içün eñ az 300 mektüp aldılar. Deyerli episi insanlarğa yollanıp alındı. Bundan ğayrı, siyasiy mabüsler, olarnı destek etken insanlarğa teşekkür bildirdiler de.

Telegram ve Facebookta Suspilne Qırım haberlerine abune oluñız

На початок