İşğal etilgen Qırımnıñ Canköy rayonındaki Cadra köyündeki caminiñ sabıq imamı, 2. derece saqatı olğan siyasiy mabüs Remzi Kurtnezirov ruhiy hastahanede 12 kilogrammğa azdı. O, bir ay devamında 1. Qırım cumhuriyet klinik ruhiy hastahanesinde makeme-ruhiy ekspertizasında buluna.
Onıñ qızı Emine İslâmova arman ayınıñ 26-da "Qırım birdemligi" cemaat teşkilâtına bunı bildirdi.
Böylece, Rusiye Federal Cezalandıruv hızmetiniñ (RFCH) inpektorı qırımtatar adamını oraq ayınıñ 18-nde makemeden evel taqiqat çerçivesinde ruhiy ekspertizağa alıp ketti. O, ömürlik saqatlı olğanına baqmadan, adamnı bir ayğa hastahanege qoydı.
Kurtnezerovğa üçünci derece gipertensiv hastalığı diagnozı qoyuldı, serebrovaskulâr hastalıq (miynen bağlı patologiya) aqibetleri bar. Bundan da ğayrı, o üç insult, qafa operatsiyasını yaşadı, şeker hastalığı bar, sağ tarafı ise bütünley areket etmey.
Adamnıñ qızı, bir aydan berli onıñnen bağ qurıp olamağanını qayd etti. Ziyaret etmege de yasaq ettiler. Qırımtatar adamı arman ayınıñ 15-nde evine qaytarıldı, anda işğalli makemeniñ ükmüni yerine ketire.
"Azbarğa kirgende, birden kördik (o, o qadar çoq kg bergenini — muar.). O pek deñişti. <... > Bu ekspertiza mecburen yapılğan edi. O hasta olğanına baqmadan, olar (RFCH — muar.) onı kene de hastahanege qoyacaqlar, dep ayttılar", — dep İslâmova añlattı.
Onıñ aytqanına köre, babasını hastahanede fena şaraitte tuta ediler, anda ruhiy hastalarnen insanlar yattılar. Odada episi olıp 11 adam bar edi.
"O yerde pek yaman bir qoqu bar edi, bu adamlar yuvnamağan ediler. Ayaqyol umumiy edi — iç bir qamaçav yoq edi. Hamam da bar — kabinası yoq, er şey ortaq. Namaz içün babam abdest alıp olamay edi, çünki musluk bütünley aşağıda olğanı sebebinden o egilmey edi. O, yardımğa muhtac bir insandır, yardımsız egilemey. Onı baqmaq, kiyindirmek, yuvmağa yardım etmek kerek. <... > O anda tek ekmek, sütlü botqa aşay ve çay içe", — dep Kreml mabüsiniñ qızı qayd ett.
Bundan evel advokat Emil Kurbedinov qayd etti ki, terrorizm davalarında taqiqatçılar ruhiy ekspertizanı keçirmege mecbur degiller.
"Amma FSB bu konveyerni qurmağa qarar berdi ve bir qaç seneden berli siyasiy mabüslerni ruhiy hastahanelerden keçirmek içün böyle stsenariyni qullana. <... > Hastahanege yerleştirüv — bu daa çoq resmiyliktir. Taqiqatçılardan böyle laflar eşitken ediñiz: "Birden o, bir ahmaqnıñ astını kesip başlaycaqmı?", — dep añlattı o.
Hatırlatamız ki, 2024 senesi saban ayınıñ 5-nde işğal etilgen Qırımda kütleviy tintüvlerniñ yañı dalğası olıp keçti. Bağçasarayda "taqiqat areketleri" "Qırım birdemligi"niñ faalcilerinde, Canköy rayonında ise diniy erbaplarda yüz berdi. Umumen, on qırımtatar adamınıñ evi tintildi.
Aynı şu künü makeme dört qırımtatar faalcisine — Memet Lümanov, Aziz Azizov, Rustem Osmanov ve Mustafa Abduramanovğa tevqif qararını berdi. Olarnı SİZOğa yolladılar. Olarnıñ episi makemelerde apiske alınğan semetdeşlerine qoltutqanları içün memuriy mesüliyetke çekilgen ediler. Bundan ğayrı, işğalciler Ali Mamutov, Enver Halilâyev, Canköy sakini Nariman Ametov, imam Vohid Mustafayev, faalci Arsen Kaşka ve sabıq imam Remzi Kurtnezirovnı tuttılar.
Er kes Rusiyede yasaqlanğan, amma dünyanıñ pek çoq memleketinde, şu cümleden Ukrainada serbest faaliyet köstergen, islâm siyasiy firqası Hizb ut-Tahrirniñ iştiraki olğanında qabaatlandı. Tutulğanlarnıñ çoqusı — çoq balalı babalardır. Bir sıra hastalıqlar sebebinden Kurtnezerov ev apsine alındı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
