Rostov-na-Donudaki Cenübiy bölge arbiy makemesi, "Hizb ut-Tahrir davası"nıñ birinci Canköy gruppasınıñ mabüsleriniñ tevqif müddetini 2024 senesi boş aynıñ 29. kününe qadar uzattı. Seityağa Abbozovnıñ ev tevqifi daa üç ayğa uzatıldı.
Advokat Emil Kurbedinov "Qırım birdemligi" cemaat teşkilâtına bu aqqında haber berdi.
Makeme oturışunda baş, Rostov-na-Donudaki 1. SİZOdan raportnı oqudı, anda bildirildi ki, Rinat Aliev "hasta olğanını uydura ve kamerasından çıqmay". Teneffüs vaqtında advokatları ögrendiler ki, SİZOda qırımtatar faalcisi ciddiy virus hastalığını çeke.
"Makeme oturışı vaqtında imaye etkenimizlerden ögrendik ki, Aliev ciddiy şekilde hastalandı. İmaye etkenimizler ayttılar ki, şimdi SİZOda nasıldır infektsiya, hastalıq, virus tarqatıla. Ve kerçekten de Aliev o qadar hasta oldı ki, yatağından turamaz, namaz qılamaz", — dep Emil Kurbedinov haber berdi.
Advokatlar ve imaye etkenleri, makeme oturışını başqa tarihqa keçirmege talap ettiler. Otuz daqqalıq teneffüsten soñ Federal Cezalandıruv hızmetiniñ ekimlerinden makemege daa bir esabat keldi, oña köre Aliev "sağlığına şikâyet etmey".
"Makemeci qarar berdi ki, bu vesiqa yeterli ve oturışnı devam ettirdi", — dep Kurbedinov qayd etti.
Advokatnıñ sözlerine köre, oturışra prokuror, oturışqa kelmegen Rinat Alievge qorçalayıcı tedbirniñ müddetini uzatmağa rica etti. İmayeci taraf qayd etti ki, eki senelik tevfqiniñ uquqiy sebebi yoq ve qorçalayıcı tedbirni yımşatmağa rica etti, amma makemeci qırımtatar faalcileriniñ tevqif şaraitini deñiştirmedi.
Bundan ğayrı, Cenübiy bölge arbiy makemesiniñ başı, Vilen Temeryanov ve Enver Kroşnıñ ömür arqadaşlarını içtimaiy qorçalayıcılar olaraq makeme oturışına yibermege red etti.
"Mabüsler ayttılar ki, daa çoq imayeci, şaatlarnı qıdırmağa teşkil ete bile. Ömür arqadaşlarını içtimaiy qorçalayıcılar olaraq körmege ister ediler. Amma makeme olarğa da red etti. Qanunlarğa köre, imaye etilgenlerniñ tek airzası ve istegi kerek olsa da, o ayttı ki, ricanıñ sebebi yoq", — dep Kurbedinov añlattı.
Makeme, berim ayınıñ 25. kününe qadar teneffüs ilân etti.
"Hizb ut-Tahir davası"nıñ birinci Canköy gruppası aqqında ne bilemiz
2022 senesi arman ayında Qırımnıñ Canköy rayonındaki evler kütleviy şekilde tintilgen soñ altı qırımtatar adamı tutuldı: Enver Kroş, Vilen Temeryanov, Rinat Aliev, Murat Mustafaev, Seityağa Abbozov ve Edem Bekirov.
Olarnı Hizb ut-Tahrir islâm siyasiy firqasında iştirak etmekte qabaatladılar. Esas "delil" — 2015 senesi camide keçirilgen subetniñ audio yazısıdır. Advokat Emil Kurbedinovnıñ fikirince, onı sekiz seneden soñ FSB arhivlerinden çıqardılar, yani bu seneler devamında qayd etilgen qırımtatarlar cinaiy taqipke oğratılmadı ve "cemiyet içün iç bir telüke teşkil etmediler".
İmayeci, FSB hadimleri Canköylı qırımtatarlarnıñ davasını Ukrainadaki adise-vaqialarnen añlı tarzda "bağlağanını" qayd ete.
"Siyasetçiler, kütleviy haber vastaları ve mahsus hızmetler Ukrainadan idare etilgen "terror merkezi" yoq etilgenini bildirdiler. Bu endi, 2022 senesi kiçik aydan soñ olğan vaqialarnen bağlı ve zamanğa uyğun bir ikâyedir", — dep Kurbedinov "Qırım birdemligi"ne ayttı.
Makeme tahqiqatı vaqtında advokat ve dava iştirakçilerine makeme araştırmasına yollanğan malümatnen tanış olmaq imkânı berilmedi. Bundan da ğayrı, bu vaqıt "terror areketleri" ya da başqa "işkence areketleri" planlaştırılmadı.
Telegram ve Facebookta Suspilne Qırım haberlerine abune oluñız
