Rusiyeniñ Moskva vilâyetiniñ Vlasıha qasabasındaki Apellâtsiya arbiy makemesi, "Hizb ut-Tahrir davası"nıñ Birinci Canköy gruppasından dört qırımtatarını arman ayınıñ 29-na qadar SİZOda qaldırdı. Daa bir mabüs ev apsinde qalacaq.
Bozarğan aynıñ 20. künü advokat Emil Kurbedinov bunı "Qırım birdemligi" cemaat teşkilâtına bildirdi.
Olar arasında qırımtatar faalcisi Enver Kroş, "Qırım birdemligi"niñ mühbiri Vilen Temeryanov, Rinat Aliev ve Edem Bekirov. Aynı vaqıtta Seityağa Abbozov ev apsinde qaldırıldı.
Makeme oturışında dava iştirakçileri bildirdiler ki, apiske alınğanından berli olarnı taqiqat izolâtorında "tamamen sebepsiz sürette tutalar". Amma ne qırımtatarlarnıñ arizasını, ne de imayeci tarafnıñ delillerini makeme nazarğa aldı ve Rusiyeniñ Rostov-na-Donu şeerindeki Cenübiy bölge arbiy makemesiniñ qararını deñiştirmemege qarra berdi.
"Hizb ut-Tahir davası"nıñ birinci Canköy gruppası aqqında ne bilemiz
2022 senesi arman ayında Qırımnıñ Canköy rayonındaki evler kütleviy şekilde tintilgen soñ altı qırımtatar adamı tutuldı: Enver Kroş, Vilen Temeryanov, Rinat Aliev, Murat Mustafaev, Seityağa Abbozov ve Edem Bekirov.
Olarnı Hizb ut-Tahrir islâm siyasiy firqasında iştirak etmekte qabaatladılar. Esas "delil" — 2015 senesi camide keçirilgen subetniñ audio yazısıdır. Advokat Emil Kurbedinovnıñ fikirince, onı sekiz seneden soñ FSB arhivlerinden çıqardılar, yani bu seneler devamında qayd etilgen qırımtatarlar cinaiy taqipke oğratılmadı ve "cemiyet içün iç bir telüke teşkil etmediler".
İmayeci, FSB hadimleri Canköylı qırımtatarlarnıñ davasını Ukrainadaki adise-vaqialarnen añlı tarzda "bağlağanını" qayd ete.
"Siyasetçiler, kütleviy haber vastaları ve mahsus hızmetler Ukrainadan idare etilgen "terror merkezi" yoq etilgenini bildirdiler. Bu endi, 2022 senesi kiçik aydan soñ olğan vaqialarnen bağlı ve zamanğa uyğun bir ikâyedir", — dep Kurbedinov "Qırım birdemligi"ne ayttı.
Makeme tahqiqatı vaqtında advokat ve dava iştirakçilerine makeme araştırmasına yollanğan malümatnen tanış olmaq imkânı berilmedi. Bundan da ğayrı, bu vaqıt "terror areketleri" ya da başqa "işkence areketleri" planlaştırılmadı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
