13 senege maküm etilgen Arsen Abhayirovnıñ apayı, aqayınıñ Buryatistan Cumhuriyetindeki 8. müstemlekeden evge yaqın olğan müstemlekege avuştırıluvı aqqında Rusiye FSBPFederal cezalandıruv hızmetige memuriy dava açtı.
"Qırım birdemligine" Azize Abhayirovanıñ advokatı Nazim Şeyhmambetov bunı bildirdi.
Qayd etilgenine köre, dava boyunca ilk makeme oturışı Qırımnıñ işğal etilgen Qurman rayon makemesinde olıp keçti. Nevbetteki oturışuv 2024 senesi berim ayına belgilendi.
"Eki sene devamında FSVPge aqayımnı evge yaqınlaştırmaq içün ariza berdim, çünki Krasnoyarsk vilâyetinde edi — 5 biñ kilometr uzaqlıqta. Amma bütün cevaplarımız red etildi. Tek sebebi farqlı edi", — dep Azize Abhayirova añlattı.
Azize Abhayirovanıñ bütün beyanatlarını Rusiyeniñ insan aqları vekâletlisi Tatyana Moskalkova ve Buryatistan Cumhuriyetiniñ insan aqları vekâletlisi Yuliya Jambalova da tekrarladı.
"Olar bütün bu arizalarnı FSVPge yolladılar. Olar ise cevap bergenlerini yazğanlar. Ve böyle devam ete. Onıñ içün menim adımdan dava açmağa qarar berdik", — dep Abhayirova añlattı.
"Böyle uzaqlıq (Arsenanıñ qorantasından — muar.) aile bağını qorçalamaq aqqını boza, yani uzaq, çoq vaqıt ziyaretlerge ve uzun körüşüvlerge sarf etilecek. Ekinciden, maddiy tarafı. Davada böyle bir şey qayd etildi, ve böyle qarar körüşüvlerge barmağa imkân bermey", — dep Narim Şeyhmambetov qayd etti.
Bundan ğayrı, siyasiy mabüs Arsen Abhayirov da bu davağa qoşula.
Hatırlatamız ki, 13 senelik apis cezasınıñ ilk eki senesini o, tuvğan evinden 5,5 biñ kilometr uzaqlıqta olğan Krasnoyarsk vilâyetiniñ Yeniseysk apishanesinde keçirdi. 2022 senesi ilk qış ayında Zamoskvoretskiy rayon makemesi, siyasiy mabüsniñ evge yaqın bir müstemlekege avuştırılmasını talap etken iddiasını qanaatlendirdi. 2023 senesi qara qış ayında makeme qararı işke tüşürildi, amma FSVP onı yerine ketirmegen edi. Bir seneden soñ, 2024 senesi qara qış ayında, qırımtatar adamı apishaneden Ulan-Ude şeeriniñ müstemlekesine — qorantasından daa biñ kilometr uzaqqa etap etildi.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
