Qırım uquq qorçalayıcısı, Bağçasaraydaki "Hizb ut-Tahrir davasınıñ" ekinci gruppasınıñ mabüsi Server Mustafayevge altı sene içinde dört balasınen beraber qorantası ilk sefer Tambovsk taqiqat müstemlekesine kelip, bir buçuq biñ kilometr yol keçti.
Onıñ apayı Maye Mustafayeva Suspilne Qırımğa körüşüvniñ nasıl keçkenini ve aqayınıñ duyğularını añlattı.
Siyasiy mabüsnen körüşüv yarım senede bir kere keçirile. Bu sefer oña bütün qorantası kelmege qarar aldı: apayı, dört balası ve anası. Olarnı tuvğanları bir künde maşinanen alıp ketirdiler, çünki yaz mevsiminde biletlerniñ fiyatı eki qat paalı.
Mustafayeva bildirdi ki, müstemlekeniñ memuriyeti qorantağa qırımtatar adamınen üç kün devamında — oraq ayınıñ 29-31. künleri — körüşmege izin berdi.
"Server alınğanda kiçik qızım 3,5 aylıq edi. Ve o, babasını endi ekinci kere kördi. Yol qıyın olğanına baqmadan, balalar özüni yahşı alıp bara ediler, çünki babalarına ketkenlerini bile ediler. Biz Server içün lezzetli şeyler pişirmek içün körüşüvden bir kün evel keldik. Ertesi künü erkenden qabul odasına nevbet peyda oldı. Ve saat 3:00te bizni Serverge alıp kettiler. Bütün bu vaqıt devamında balalar sabırnen bizlerni bütün protseduralardan keçmege, eşyalarımıznı baqıp çıqmağa beklediler. Bizge uzun körüşüvler içün bir oda berdiler, soñ daa bir oda berdiler. Balalar babasınen laf etip, nevbetteki sefer kim ketkenini tartışa ediler. Çünki şimdi tatilde ediler, bu sefer er kesni aldılar", — dep siyasiy mabüsniñ apayı añlattı.
Onıñ aytqanına köre, Mustafayev, bulunğan şaraitlte özüni yahşı duya. Er kün eñ az eki saat sportnen oğraşmağa tırışa, onı yürmege de alıp baralar, amma nezaret altında, çünki onı sert şaraitte tutalar.
Mustafayeva şunı da qoştı ki, qırımtatar adamı daa evel umumiy taqımda edi. O çalışqan, universitetke oquşqa azırlanğan edi, oña kompyuterni de qurmaq kerek ediler, amma 2023 senesi orman ayında aqayını sert tutuv şaraitine etap ettiler. Bundan soñ oña tükân, hastahanege barmağa ve çalışmağa yasaq ettiler. Bunıñ yerine Server çoq oquy.
"Oña Quran ve kitaplarnı oqumağa izin berdiler, ve o, bundan pek memnün. Doğrusı, közlerinen bağlı meseleler bar. O, közlüklernen oquy ve yaza. Endi çoq şey körmey. O, ceza izolâtorında kün ışığı olmağan kamerada oturğan soñ tüşti. Vitamin ve körüv içün ilâc ala.
Tabiiy ki, ağır şarait devri oña tesir ete — terisi beyaz, çünki yarıqnı az köre. Onıñ kardiogramması yapıldı, amma ekim alâ daa baqmadı. Soñki vaqıtları ortoped onı baqtı. Server ayaq ağrıdan şikâyet ete edi, onıñ içün biz oña mahsus ayaqqaplarını yolladıq", — dep Maye qayd etti.
Bundan da ğayrı, o añlattı ki, Kremlniñ mabüsi Nariman Celâlnıñ azat etilmesi aqqında bilgen soñ, bunı Mustafayevge telefon vastasınen bildirdiler — telefonlar künde 15 daqqağa berile.
"Elbette, o, Nariman aqqında haberden memnün edi. "Daa bir qırımtatar azat etildi", - dedi. Ve körüşüvde bile bunı muzakere ettik. O, Narimannıñ qorantasına selâm ayttı. Ve elbette, onıñ aytqanı kibi, bizim qapılarımız da açılacağına ümüt ete. Ümüdini coymay — aksine, 6 sene keçti, amma Server bizge inanmağa küç bere", — dep siyasiy mabüsniñ ömür aqradaşı qayd etti.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
