İşğalli Kirov rayon makemesi, Eski Qırım şeerinde yaşağan qırımtatar Emine Zekeryayevanı "cinayet aqqında haber etmegeninde" qabaatlı tanıp, oña 50 biñ rublelik (≈ 23 biñ grivna) para cezasını berdi.
“Qırım birdemligi” bu aqqında haber berdi.
Böyle degen taqiqatnıñ versiyasına köre, 2016 senesi Zekeryaeva "VKontakte"de Suriyege ketken ve "Rusiye Federatsiyasınıñ menfaatlarına qarşı kelgen" maqsatlarınen "silâlı teşkilâtqa qoşulğan" ve terror aktını yapmağa planlaştırğan Ukraina vatandaşı Madina Strâpçanen subet ete edi.
Qırımtatar qadını, 2023 senesi arman ayında evi tintilgen vaqtında taqiqatçılarğa Strâpça aqqında malümat bermedi ve bu malümatnı gizledi, dep qabaatlandı.
"FSB tarafından elde etilgen yedi sene evel "VKontakte"de yazılğan mektüplerden bir kimse cinayet azırlağanını ya da yapqanını añlatmay. Meni qabaatlamaqnıñ iç bir uquqiy sebebi yoq edi", - dep advokat Emil Kurbedinov bildirdi.
Emine Zekeryaeva özü de qabaatlı olmağanını qayd etti. Advokatınen beraber işğal etilgen Kirov rayon makemesiniñ ükümine itiraz bildirmege niyetlene.
Hatırlatamız ki, keçenlerde beş qırımtatarğa qarşı "cinayet aqqında haber etmeme" davaları açılğan edi. Emine Zekeryevadan ğayrı, bunıñ kibi qabaatlavlar Ridvan Umerov, Ayder Kadırov, Ayder Ablâkimov ve Enver Topçige qarşı da bildirildi.
Emine Zekeryayeva aqqında ne bilemiz
Zekeryayevanıñ 18 yaşına yetmegen mektepten tış ayşındaki eki balası bar.
2023 senesi arman ayınıñ 7-sinde işğalciler onıñ evini tinttiler. O zaman qız, ana-babasınıñ evinde edi. FSB işçileri evini tintmek içün onı evge alıp ketirdiler. Birazdan qırımtatar qadına, Suriyege ketken ukrain vatandaşınıñ cinaiy davasında şaat olğanı aqqında haber berdiler. Evini tintken soñ taqiqatçılar, Zekeryayevanıñ cep telefonını açmağa tırıştılar. O advokatnı rica etti, amma işğalciler oña telefon etmege izin bermediler.
Bundan ğayrı, evini tintken soñ onı ve aqayını Aqmescitteki FSB binasına alıp ketirdiler.
Berim ayında belli olmağan bir insan oña daa bir kere telefon etip ayttı ki, onıñ evindeki tintüvde iştirak etti. Adam, taqiqat işleri içün Zekeryayevanıñ Canköydeki işğal Taqiqat eyyetine kelmesini talap etti. Qırımtatar qadını, şeadetname yollamağa soradı. Qurbedinovnıñ sözlerine köre, anonim mecburen kelecegini ve onı "Taqiqat eyyeti"ne alıp ketecegini ayıp qorquttı. Bunıñ içün advokat FSBge soratıcı ariza yazdı, amma oña yazdılar ki, "bozma tanınmadı".
2022 senesi para qış ayında Aqmescitteki işğal politsiyasiniñ işçileri, onıñ aqayı Asan Zekeryayevğa qarşı bir protokol tizdiler. "Makeme" binası yanında bulunğanı sebebinden. Mahsus tutuv müessisesinde 14 künlik memuriy tevqifni keçirdi.
Dört qırımtatar adamına: Ridvan Umerov, Ayder Kadırov, Ayder Adlâkimov ve Enver Töpçige qarşı "haber bermeme" aqqında davalar açtılar.
Telegram ve Facebookta Suspilne Qırım haberlerine abune oluñız
