İşğal etilgen Qırımda tolu miqyaslı istilâ başlağan soñ, muqavemet areketleri bir qaç inkişaf basamağından keçti — işğalge qarış muqavemetten sistemalı ve teşkil olunğan işke qadar, ayrıca "Sarı şerit" areketi peyda oldı. "Ateş" arbiy-partizan areketiniñ agentleriniñ yardımınn yarımadada bir çoq Rusiye arbiy noqtası, şu cümleden 2023 senesi berim ayında Rusiye Qaradeñiz flotunıñ ştabı ve bu sene mayıs ayında ücüm etilgen Rusiye Krasnodar vilâyetiniñ "Kavkaz" deñiz limanındaki vapur keçiti ve yermay bazası zarar kördi.
Suspilne Qırım jurnalistleri "Sarı şerit" ve "Ateş" areketleriniñ idarecilerinen eki seneden ziyade devamında olarnıñ işinde olğan deñişmeler ve yarımadada işğalcilerge muqavemet aqqında subet ettiler.
"Sarı şerit"
Areketniñ idarecisiniñ aytqanı kibi, birinciden yarımada boyunca haotik muqavemet peyda oldı. Bu içtimaiy ağlardaki yazılar, soqaqlarda laf etüv ve yerli subetlerde yazılarnen bağlı edi. Soñra bu, vatanperverlik bayraqları ve graffiti şeklinde muqavemet tarqalmağa başladı.
"Bütün narazılıqlarnıñ başlayıcılarından biri, insanlarğa bunı telükesiz, tertip ve sistemalı şekilde nasıl yapmaq mümkün olğanını köstergen "Sarı şerit" areketidir. Bu, muqavemetniñ inkişafınıñ esas basamaqlarından biri edi. Bundan soñ, epimiz yañı areketlerniñ peyda oluvını köremiz, olar belli olalar. Bu "Qırım arbiy çağalaları", "Açuvlı Mavka" ve başqa areketler, şu cümleden daa çoq cemkiyleştirilgen areketler", — dep qayd etti o.
İdareci qayd etti ki, muqavemet — tek içtimaiy ağlardaki Ukrainağa qol tutqan yazılar degil, Ukrainağa qol tutqan graffiti, sarı şeritler, levhalar, cenkiyleştirilgen tarafı da bar.
"Bundan evel biz, birer-birer adise ve vaqialarnı körgen edik, şimdi ise yarımada boyunca bu, çoq adamnıñ sistemalı işidir. Olar Ukraina vatanperverleri, olar er kün çalışıp, öz şeerlerini, yarımadasını eñ yaqın vaqıtta azat etmek içün çalışalar. Areketimiz esasen telükesiz messengerler vastasınen çalışa, bundan da ğayrı, Telegramnı çat-botumıznıñ qullanıcılarınıñ ilk filtrası olaraq qullanamız, böylece kim provokator olğanını, kim FSBci olğanını, kim adiy yazıcı olğanını ve kim kerçekten de zorbalıqsız muqavemet vazifelerini eda etmege azır olğanını köremiz. Bu insanlarnı daa telükesiz bir bağğa keçirmege tırışamız", — dep adam añlattı.
Onıñ malümatına köre, Ukrainanıñ bütün işğal etilgen topraqlarında bu areketniñ 15 biñden ziyade faalcisi bar, olardan Qırımda — 5 biñden ziyade qullanıcısı tek faal şekilde çalışqan "Razom" chat-botunda bar. Bu yerge rus ve duşmannen işdeşlik yapqanlarnıñ arbiy cinayetleri aqqında malümat yollaylar, em de zorbalıqsız muqavemet vazifelerini yapalar.
"Bu raqam bizni şaşırtmay, çünki işğal etilgen topraqlar arasında eñ faal Qırımdır. Bu köstergiç pek yahşı, çünki Qırımdaki muqavemet, körgenimiz kibi, şimdi eñ faaldir", — dep "Sarı şerit"niñ idarecisi qayd etti.
Faaller işğalge qarşı yañı usullarnı tüşünip çıqarıp, onı rağbetleştirmege tırışqan vaqıt, Rusiye quvetçileri buña qarşılıq köstermek içün yollar tapalar. Ayrıca, pek çoq kamera qoyula, qaravullar quvetleştirile, olarğa başqaları aqqında "sözler" yollanıla.
"Biz insanlarğa bunı nasıl toqtatmaq, nasıl qorçalamaq mümkün olğanını ve nasıl kiber-tabiiy temizligini nezaret etmege ögretemiz. Bularnıñ episi bir-birine bağlı. Rusiyelilerniñ qarşı diversiya rejimi quvetleşe, biz ise qarşılıqnıñ yañı yollarını ve usullarını qıdıracaqmız. Biz olarnı yetiştirgende olarnıñ qarşı diversiya rejimi quvetleşe. Ve biz bir-birimizge qarşı adım-adım areket etemiz", — tafsilâtlıca añlattı o.
Lâkin bazıda işğalciler faalcilerni tapa bileler. Ayrıca, keçken sene FSB hadimleri 59 yaşındaki Aqyar şeeriniñ sakini Violetta Stolârovanı tuttılar. Rusiye quvetçileri onı kamera qarşısında yazılğan metinni oqup, afu soramağa mecbur ettiler. Soñra Violettanıñ telefonı teşkermek içün alındı ve evge yiberildi. Bu vaqialardan soñ qırımlı qadın yarımadanı terk etmege qarar berdi, dep o vaqıt Suspilne Qırımğa ayttı. Şu anda Stolârova Ukraina nezaretindeki topraqlarında buluna.
Aynı zamanda "Sarı şerit"niñ idarecileri, faalcileriniñ tutuluvı aqqında malümat alğan soñ, birinci nevbette olarğa yardım etmege ve olarnı kontrol etilgen topraqlarğa qaytarmağa tırışalar.
"Amma Rusiye faalcilerimizni ve Qırımdaki Ukraina vatanperverlerini qorqutmaq içün sahte videolarnı yaratqanlarını añlamaq kerek. Ruslılar bütün makeme vesiqalarını gizleyler, olarnı iç bir vaqıt teşkermek, davanıñ nomerasını, faal olıp-olmamasını, qaysı basamaqta olğanını, insanğa berilgen ceza ögrenmek mümkün degil. Bu sebepten Qırım SMERŞıiniñ bilgilerine inanmamaq kerek. Oleksandr Talipovğa işanmaq kerekmey. FSB reberligi olarğa Qırımdaki muqavemetni bastırmaq vazifesi berildi", — dep areketniñ idarecisi qayd etti.
Bu, ealiniñ qorqutılmasına ve yañlış yaqalav ve apiske alınuv aqqında sahte malümatnıñ yaratılmasına da aittir. İşğalcilerniñ ya "diversiyacılarnı", ya da zorbalıqsız muqavemet areketiniñ faalcilerini tutmağa kimsesi olmağanda, olar sarı-mavı manikürli, ya da sarı-mavı urbalarını qurutqan, ya da Qırımda ukrain yırlarını diñlegen insanlarnı tutmağa başlaylar.
Onıñ añlatqanına köre, yarımadada Rusiye quvetçileri tutulğan "terrorcılar" ve "diversiyacılar"nıñ statistikasını yaratıp, Moskvağa yollamaq içün böyle areketler yapalar.
"Şimdi Qırımdaki Ukraina tarafdarınıñ vaziyeti gizli nazar noqtasına oşağan bir şey, çünki Qırımdaki işğalli akimiyet ukrainalılarnı qorqutmaq içün pek yahşı çalışa. Qırımdaki er bir ukrainalı añlay ki, içtimaiy ağlarda yazğan er bir yazısı, zorbalıqsız muqavemetniñ er bir faaliyeti içün mesüliyetke çekile bilir. Ve bu büyük bir telükedir. Qırımda vatanperverler çoq, amma öz telükesizligi içün saqlanalar", — dep "Sarı şerit"niñ idarecisi qayd etti.
"Ateş"
Bu arbiy-partizan areketiniñ agentleri arasında RF Silâlı Quvetleriniñ askerleri bar. "Ateş" em çalışqan aaskerlerni celp etip, em de öz başına agentlerni olarğa faydalı olğan Rusiye bölüklerine celp ete bile.
Areketnin idarecisiniñ aytqanına köre, bu agentler diversiyalarnı kerçekleştireler, arbiy bölüklerde tehnikanı bozalar, Ukrainanıñ işğal etilgen topraqlarındaki bölükleriniñ bulunğan yeri aqqında malümat bereler. Bundan da ğayrı, Rusiye qısımlarınıñ vaziyeti aqqında içki malümat ve pek çoq müim vesiqalarnı bereler.
Bundan başqa, partizanlarnıñ işiniñ yardımınen pek çoq Rusiye arbiy noqtası zarar kördi.
"2023 senesi berim ayınıñ 22-nde Qaradeñiz flotunıñ ştabına yapılğan ücüm eñ müim ola bile, o vaqıt ştabnıñ zambitlerinden "ATEŞ" areketiniñ agenti ştabnıñ reberleriniñ yerleri ve vaqtı aqqında bildire edi. Bundan ğayrı, Saq, Qaçı, Canköy arbiy uçaq limanlarına, Kezlevdeki alâqa qısımlarına ve AMS vastalarına pekçoq ücüm yapılğanını qayd etmek mümkün. "Ateş" agentleri ve Aqyarlılarnıñ yardımınen "Minsk" büyük desant gemisi ve "Rostov-na-Donu" suv astındaki gemisi tapılıp yoq etildi", — dep ayttı o.
Soñki ücümler arasında adam, Rusiye Federatsiyasınıñ Krasnodar vilâyetinde Keriç civarındaki "Kavkaz" limanında vapur keçiti ve yermay bazasına ücüm etkenini qayd etti. Onıñ yardımınen Qırımğa yengil yermat mahsulatı ketirildi. Bu areketniñ agentleri bu obyektni er vaqıt teşkergen ve Ukraina Mudafaa quvetlerine malümat bergen ediler, bu ise bu müim arbiy obyektke ateş açmağa imkân berdi.
Bundan ğayrı, işğalciler Qırım köprüni yaqarlıq ve arbiy tehnika taşımaq içün yañıdan qullanalar, bu obyektniñ bir qısmı yoq etilgeninden berli böyle bir şey olmadı. Partizanlar ise ruslarnıñ logistikasını yoq etmege yardım eteler, umumen cenk areketleriniñ ketişatına tesir eteler. "Ateş" idarecisi, areket agentleriniñ cenkke qoşqan issesini "aşırmaq qıyın", dep qayd etti.
Aynı zamanda rusiyeniñ tolu miqyaslı istilâsı başlağan soñ "Ateş" tamamınen deñişti.
"Biz Qırımdaki kiçik faal taqımından bütün Rusiyede ve Ukrainanıñ işğal etilgen topraqlarında faaliyet köstergen eñ büyük partizan areketi oldıq. Bizim adamlarımız Ukrainanıñ işğal etilgen er şeerinde bulunalar. Bizim pek çoq müim malümatımız bar. Onı Ukraina Mudafaa quvetlerine beremiz, em de öz maqsadlarımız içün kelecekte ameliyatlarnı planlaştırmaq maqsadınen qullanamız", — dep qayd etti o.
Areketniñ idarecisi qoştı ki, teşkilâtnıñ içi pek deñişti ve kenişletildi, amma partizanlar Rusiye ordusını içten yoq etmek içün qabiliyetlerini arttıralar. Buña baqmadan, er vaqıt inkişaf etmek içün yer bar, şimdi "Ateş" kenişlemege devam ete, dep añlattı o.
Onıñ sözlerine köre, işğal etilgen topraqlarda çalışmaq daa da zor olıp tura, çünki ruslar ukrain gizli faaliyetini toqtatmaq içün elinden kelgenini yapalar.
"Rusiyeden ketirilgen askerlerniñ sayısı arta, nezaret kameralarınıñ sayısı da arta, mahsus tehnikiy vastaları çalışa, arbiy bölüklerinde ise RF içki havfsızlıq hadimleri, rus askerleriniñ "Ateş" areketinen işbirligini ögrene. Rusiye askerlerine cep telefonlarını qullanmağa sıq-sıq yasaq eteler. Bir qaç kere tintüvler ve teşkerüvler keçireler, misal içün, aynı RF Silâlı quvetleriniñ 810-ncı deñiz piyade taqımınıñ evlerini tinttiler ve teşkerdiler. Faaliyetimiz aqqında bütün malümat Rusiye istihbarat hızmetleriniñ yüksek ştablarına berile, bunı yahşı bilemiz", — dep areketniñ idarecisi añlattı.
Bundan ğayrı, o ayttı ki, Qırımğa Rusiye FSBniñ qoşma mahsus gruppalarınıñ kelmesi qayd etilgdi. Olar içün reberliginiñ yekâne vazifesi - Qırımdaki ukrain gizli areketleriniñ azalarını tapmaqtır.
"Amma olarnıñ tedbirleri bizni toqtatamaz. Bizim areketimizniñ agentleriniñ sayısı daimiy sürette arta, em de Rusiye arbiy maşinasına ketirgen zararımız da arta, — dep "Ateş"niñ idarecisi bildirdi.
Telegram ve Facebookta Suspilne Qırım haberlerine abune oluñız
