İşğal etilgen Aqmescitteki Kıyiv rayon makemesi, keçken sene tutulğan qırımtatar Eldar Yakubovnıñ apayı Ayşe Yakubovağa 1 biñ rublelik (417 grn — muar.) para cezasını tasdıqladı. "Makemecisniñ emrini yerine ketirmegeni"RF MBQniñ 17.3. maddesiniñ 2. qısmı içün qara qış ayınıñ 17. künü oña qarşı protol tizildi, çünki o, makeme ceryanı biter-bitmez aqayınıñ fotoresimini çıqarmağa ıntıldı.
Advokat Rustem Kâmilevge atıf eterek "Qırım birdemligi" bu aqqında haber berdi.
O hatırlattı ki, Ayşe Yakubova aqayınıñ fotoresimini yapmağa ıntılğanı içün "makemeci" oña tenbilegen soñ Ayşe birden fotoresimini sildi. Faqat işğal makemesi bunı körmemezlikke urdı.
"Makeme binasına kirmeden evel insanlar, ziyaret qaidelerini bilmeliler. Elbette, insanlarnıñ 99%-i bunı bilmey", — dep advokat ayttı.
Hatırlatamız ki, saban ayınıñ 14. künü tizilgen "protokol"ğa köre qadınğa 1 biñ ruble (417 grn — muar.) para cezasını berdiler.
"Şimdi dört kiçik balanı baqqan qadın 60 kün devamında para cezasını ödemeli", — dep Kâmilev haber berdi.
Keçenlerde Ayşe Yakubova, işğalciler tarafından maküm etilgen aqayınen körüşe bildi. 8 ay devamında onen körüşip olmağan edi.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
