Qırımtatar faalcisi Arsen Kaşka ve daa dört tevqif etilgen qırımtatar adamınıñ tevqif müddeti arman ayınıñ 3-üne uzatıldı. İşğal etilgen Qırımnıñ Aqmescit şeerindeki 2. taqiqat izolâtorında Arsen Kaşka eki kere bayıldı.
Çiçek ayınıñ 25-inde makeme oturuşında adamnen laf ete bilgen advokat Emil Kurbedinov "Qırım birdemligi"ne bu aqqında haber berdi.
"O ayttı ki, bir qaç kün evel özüni pek yaramay duyğan edi. Atta bayıldı. Taqiqat izolâtorına ketip bu aqqında ondan sorarım. Ayttı ki, eki kündir özüni normal duya, elbette şu şartlarda sağlığı zayıflaşa", — dep Kurbedinov qayd etti.
Aynı zamanda o qoştı ki, çiçek ayınıñ 25-inde tevqif müddeti uzatılğan "Hizb ut-Tahrir davası"nıñ üçünci Canköy gruppasınıñ tüm iştirakçileri "güzel ruhiy aldalardır ve ruhu bozulmadı".
"Añlaylar ki, bu sınav ve ya erte ya da keç biter ve episi bu sahte qabaattır", — dep advokat qayd etti.
"Hizb ut-Tahrir"niñ üçünci Canköy gruppası aqqında ne bilemiz
2024 senesi saban ayınıñ 5-inde işğal etilgen Qırımda yañı kütleviy tintüvler dalğası keçti. Bağçasaray ve Canköy rayonında rus quvetçileri onlarca qırımtatarnıñ evlerini tinttiler.
Aynı kün "makeme" olardan dörtüni — qırımtatra faalcisi Memet Lümanov, Aziz Azizov, Rustem Osmanov ve Mustafa Abduramanovnı 2. SİZOda 2024 senesi mayıs ayınıñ 4-üne qadar tevqif etti.
İşğal etilgen Aqmescitteki Kıyiv rayon makemesi, işğal etilgen Qırımda yañı kütleviy tintüvlerden soñ rus quvetçileri tarafından tutulıp qapatılğan 6 qırımtatar faalcisine ve diniy erbapqa qorçalayıcı tedbirni sayladı. Eski imam Remzi Kurtnezirovğa ev tevqifi şeklinde qorçalayıcı tedbir saylandı. işğal etilgen Aqmescitteki Kıyiv rayon makemesi Amet Nariman, Ali Mamutov ve Arsen Kaşka, enver Halilev ve Vayit Mustafaevni 2024 senesi mayıs ayınıñ 5-ine qadar tevqif etmege üküm çıqardı.
Olarnı "Hizb ut-Tahrir" islâm siyasiy fırqasında iştirak etmege qabaatlaylar. Olarnıñ çoqusı çoq balalı babadır.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram, Viber ve Facebookta Suspilne Qırım haberlerine abune oluñız
