Çiçek ayınıñ 17-sinde qırımtatar uquq qorçalayıcısı ve jurnalisti Lütfiye Zudiyevanıñ memuriy bozması aqqında dava baqıldı. "Makemeci" onı qabaatlı tanıdı ve 2000 ruble (837 grn) cezasına maküm etti.
"Qırım birdemligi"ne bu aqqında haber berdi.
"Bugün makemeci meni qabaatlı tanıdı, 2000 ruble cezasına maküm etti ve men tüşünem ki, menim sebeplerim ve delillerim — memuriy mesüliyetten qaçmaq ıntıluvıdır. Makeme oturışında men qayd ettim ki, Aşırıcılıqqa qarşılıq merkeziniñ işçileri memuriy davanıñ bilgilerini pek formal şekilde ögrendiler ve qaba bozmalarnen onı qapattılar. Men tüşünem ki, delillerge köre de ciddiy bozmalar bar. Yazıq ki, makemeci buña diqqat etmedi. Elbette, men apellâtsiya şikâyetnamesini yollaycağım ve kassatsiya makemesine hitap etecegim", — dep Zudiyeva qayd etti.
Onıñ sözlerine köre, jurnalist ve uquq qorçalayıcı faalyetinen oğraşmağa devam etecek, çünki tüşüne ki, onıñ areketleri rus qanunlarını bozmadılar.
Advokat Nazım Şeyhmambetov qayd etti ki, qorçalayıcı taraf apellâtsiya şikâyetnamesini yollamağa azırlana. Bundan ğayrı, onıñ sözlerine köre, işğal makemesi qorçalayıcılarnıñ bergeni delillerge diqqat etmedi.
Lütfiye Zudiyeva aqqında ne bilemiz
Lütfiye Zudiyeva, "Qırıjm birdemligi"niñ faalcisi ve "Gratı"nıñ jurnalistidir. Qırımdaki makeme ceryanları ve insan aqları bozmalarını aydınlata. 2014 senesinden evel bala merkezini reberlik ete edi, işğalden soñ ise uquq qorçalav saasında çalışmağa başladı.
2019 senesi içtimaiy ağlarda post sebebinden Zudiyeva tutuldı. O zaman "aşırıcılıq timsaller"nen paylaşqan faalci, 2 biñ ruble cezasını ödedi.
Oraq ayınıñ 27-sinde işğal etilgen Qırım Yuqarı makemesinde video bağ vastasınen Soçi şeerindeki umumiy yurisdiktsiyalı Üçünci Apellâtsiya makemesinen berbaber "Nariman Celâl ve Ahtemov qardaşlarınıñ davası"na bianen üküm çıqarıdı. "Makeme" binası ögünde Lütfiye Zudiyeva da tutuldı. Birazdan jurnalistke 12 biñ rublelik para cezasını berdi. 2024 senesi kiçik aynıñ 12-inde RF Kasatsiya makemesi, para cezasına şikâtenamesini baqmağa aldı.
Kiçik aynıñ 22-siniñ sabasında işğal uquq qorçalayıcıları organlarınıñ işçileri, Lütfiye Zudiyevanıñ evini tinttiler. Bundan soñ faalcini böyle degen Aşırıcılıqqa qarşı merkezine kettiler. 3 saat anda buluna edi. "Kütleviy malümat azatlığı suisitmalı" sebebinden oña qarşı memuriy protokollar tizildi.
Telegram ve Facebookta Suspilne Qırım haberlerine abune oluñız
