Advokat Edem Semedlâev Salavat (Başqırtistan Cumhuriyeti) şeerindeki rus müstemlekelerinde 11 siyasiy mabüsni ziyaret etti.
"Qırm birdemligi"ne bu aqqında haber berdi.
Şu cümleden, çiçek ayınıñ 15-inde VK-2de uquq qorçalayıcı Vadım Siruk, Teymur Abdulaev, Ayder Saledinov, Rıslan Zeitulaev ve Muslim Alievni ziyaret etti.
"Er kes, bu qadar çoq sene canavar şartlarında, suvuq ve temiz olmağan bölgede bulunğan insan olaraq öne duya. Salavat şeerinde pek çoq himiyaviy ve qayta işlev zavodı bar, er bir yerde borulardan kirlengen ava çıqa, hoşsuz qoqu duyula", — dep añlattı.
Semedlâev qayd etti ki, uzun zamandır Aliev Muslim ve Teymur Abdulaev ceza izolâtorında bulunalar.
"Olarnıñ anda bulunmalarınıñ resmiy sebebi – olarnıñ çalışmağa red etüvidir. Oğlanlar ise başqa sebeplerni bildirdiler. Böylece olarnı izolâtsiya şeklinde tutmağa qarar berdiler. Olarnıñ çalışmamaları, sahte bir sebeptir. Olarnıñ bulunğanları şartlarda baqmadan, olar orada tuttılar. Er keske selâm berdiler. Ruhları bozulmadı. Cesaretnen dayanalar. Añlaylar ki, nasıldır turmuş cinayetleri sebebinden degil, siyasiy sebeplerden apis olundılar", — dep uquq qorçalayıcı qayd etti.
Çiçek ayınıñ 16-sında Edem Semedlâev VK-16da Emil Cemadinov, Üzeyir Abdulaev, Emir-Usein Kuku, Enver Seitomasmanov, İnver Bekirov ve Rustem İsmailovnı ziyaret etti.
"Er kesni kördim. Birer yanıma ketirdiler, er birinen subet ettim. Er kesniñ keyfi normal, ruhları bozulmadı. Er kes tek maña degil, halqına da teşekkür bildirdi. Em olarğa, em de ailelerine yardım etkenleri içün. Tek maliyeviy degil, ruhiy destek te etkenleri içün", — dep advokat haber berdi.
Bundan ğayrı, o añlattı ki, İnver Bekirovdan ğayrı, er kesniñ sağlıq alı normal. Şu cümleden, onıñ basımı yüksek, buğumlar ve arqası ağıra.
"Buña baqmadan müstemlekeniñ memuriyeti, onıñ çalımasını talap ete. Oğlanlar dikiş saasında çalışalar", — dep Semedlâev hulâsa çıqardı.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram ve Facebookta Suspilne Qırım haberlerine abune oluñız
