Çiçek ayınıñ 10-unda Oraza bayramı künü "Hizb ut-Tahrir davası"nıñ ekinci Bağçasaray gruppasınıñ iştirakçisi, qırımtatar Seyran Salievniñ ailesi, Qırımdan biñ beş yüz kilometr uzatlıqtaki Tulsk vilâyetiniñ Plavsk şeerindeki 4. müstemlekede onı ziyaret etti.
Suspilne Qırım jurnalistleri, üç kün apishaneniñ körüşüv odasında aqayı ve balalarınen nasıl keçirgenini añlatqan siyasiy mabüsniñ apayı Mumine Salievanen subet etti. Ailesiniñ işğal etilgen yarımadadan oña yol eki kün sürdi.
"Ketmeden bir qaç kün evel evge qapımız er vaqıt açıq edi — yola çıqacağımıznı ögrengen qomşularımız, dostalarımız, aqrabalarımız yanımızğa kelip, bizge yol yapalar. Mubarek Ramazan ayında qomşularımız qatlama yapıp, bizge berdiler ve olarnı Seyranğa bermege rica ettiler", — dep Salieva añlattı.
Beş senede ilk kere aile, 2022 senesi orta küz ayında Tulsk vilâyetindeki rus müstemlekesinde siyasiy mabüsni ziyaret etti. Bundan ğayrı, yedi senede ilk kere aile muqaddes Ramazan ayında iftarda beraber oldı. Kiçik qızı Safiye, babasınen körüşmege eñ çoq beklegen edi.
"Safiye birden yanına qoştı ve öpmege başladı, quçaqladı, onıñ boynuna atladı ve o zaman qorqa edi ki, ilk kere beş ay yaşında olğanda babasını körgen ve uzun zamandır babasını körmegen Safiye onı böylece qarşılaşmaz. Ve bundan soñ maña mektüplerde qızınıñ onı qabul etmesi içün Allağa dua etkenini ve bundan ne qadar bahtlı olğanını yazdı", — dep qadın hatırladı.
Onıñ sözlerine köre, balalarnıñ babasınen birleşkenlerini ve olarnıñ bozulmağan ve körünmez bağ saqlay bilgenlerini körmek em acı, em de quvançlı edi.
"Teessüf ki, repressiya sisteması bizim şahsiy aile ayatına saip olmaq aqqımıznı bozdı ve balalar günası olmadan öksüz qaldılar ve baba ise balalarınıñ nasıl büyügenlerini körmey. Hatırlayım ki, bir buçıq sene evel ilk kere uzun bir körüşüvke ketkende 5 seneden soñ balalarını tanımadı, olarnıñ öz evlâtları olğanlarını añlap olamadı", — dep qadın açıqladı.
Bu sefer ise bayram sebebinden Salih, Samiye, Süriye ve küçük Safiyenen beraber körüşüv odasını donattılar ve bayram sofrasını yaptılar.
"7 sene aynı tüslü divarlarda keçirgen soñ adiy parlaq kürreçikler onıñ içün pek müim edi. Ve odanı ilk kere körgende birinciden qızlarnı, bundan soñ oğlu ve meni öpti, quçaqlardı. Bir-birimizni Ramazan ayınen hayırladıq. Ve bizim aile ananemiz bar, bu aynıñ deyerli er künü Seyran bizge bir şey ediye ete ya da nasıldır tatlı şeylerni alıp bere edi. Balalarımız içün öz ellerinen adlarınen yastık üstlerini ve oğlumıznıñ er vaqıt yanına alması maqsadınen küçük Quran içün qap nağışladı", — dep Salieva ayttı.
Bayram iftarında Kreml reinesiniñ apayı özüni ğarip duya edi, çünki aqayınıñ tevqifi sebebinden az quvanç ve baht duya.
"Böyle bahtlı ve quvançlı alda ğç kün keçirdik — olar o qadar qoymelti edi ki, yüreklerimizde issesi qaldı. Bu künler oña muqavemet köstermege ve devam etmege ilham berdi. Ve men inanam ki, şu körüşüvler bizge bütün bu manialarnı aşamağa yardım eteler", — dep qayd etti.
Endi deyerli yedi sene evel qırımtatar adamı apis etildi. 2022 senesi küz mevsiminden berli Plavsk müstemlekesinde buluna. Mümine ayttı ki, sağlığına şikâyet etmey, amma müstemleke onıñ bedeniy ve ruhiy alına tesir etti.
"Onı raatsız etken şeyler aqqında asla laf etmez. Körgenim tek şey, terisiniñ tüsü edi. O, serbest insannıñ terisi kibi degil. Terisi boznen beyaz ve D vitamininiñ kemligi qayd etmek mümkün. Ve tişleri pek çoq yaramay olalar", — dep siyasiy mabüsniñ apayı añlattı.
Salieva añlattı ki, balaları içün babasınen körüşüvniñ eñ zor şeyi, soñ üçünci kün oldı. Baba, büyük oğlu Salihke ailesiniñ başı olmağa emir etti. Küçük qızı Safiye babasından ayırmaqtan eñ çoq bathsız oldı.
"Köürşüvniñ üçünci künü soñ edi ve saba erte ketmeli edik ve bütün kün devamında ağlay edi. Ketmege istemey edi. Tüşüniñiz, bala cep telefonı almadan üç kün devamında izolâtsiyada buluna ve çıqamaz. Balalar içün bu pek zor. Onıñ içün degil. O ise maña: "Anam, mında daa eki kün qalsaq, lütfen, ketmege istemeyim, babamnıñ mında qalmasını istemeyim", dep rica ete edi", — dep hatırladı.
2017 senesi aqayı tevqif etilgen soñ Salieva, 18 yaşına yetmegen dört balasını öz başına büyüte. Bundan ğayrı, bir qaç senedit uquq qorçalayıcı faaliyetnen oğraşa — başqa siyasiy mabüslerniñ ailelerine yardım ete. Suspilne Qırım öz haberlerinde bunı añlattı.
"2017 senesi Seyran apis etilgen soñ qırımtatar cemaatınıñ münevleriniñ desteginen men, siyasiy mabüslerniñ balaları içün "Qırım balalığı" leyhasını teşebbüs ettim. Onıñ üç yönelişi bar: ruhiy, reabilitatsiya, tibbiy ve intelekt. Bugün 18 yaşına yetmegen 254 balanı eybetleymiz, olardan 14ü babaları tevqif etilgen soñ doğdı", — dep qırımtatar qadını bildirdi.
Seyran Saliev apis etilmeden evel qılavuz olıp çalışqan edi. Tasili — türk ve qırımtatar dillerinin tilşınası. Bundan ğayrı, "Qırım birdemligi"niñ içtimaiy jurnalisti edi — qırımtatarlarğa qarşı açılğan sahte davalar ve qanunsız tintüvlerni aydınalatqan edi. 2017 senesi orta küz ayınıñ 11-inde aynı sahte davanıñ iştirakçisi oldı.
O ve Timur İbrahimov, Marlen (Süleyman) Asanov, Memet Belâlov, Server Zekiryayev ve Ernes Ametov Rusiyede yasaqlanğan, amma dünyanıñ çoq ülkesinde serbestçe faal etken Hizb ut-Tahrir teşkilâtına ait olmağa qabaatlandı. İşğal makemesi adamı 16 senege maküm etti.
Telegram ve Facebookta Suspilne Qırım haberlerine abune oluñız
