"Hizb ut-Tahrir davası"nda 14 senege maküm etilgen içtimaiy jurnalist Rustem Şeyhaliyevniñ burnu eki kere qanadı. O, Novoçerkasktaki 3. SİZOdan video alâqası vastasınen ükümine apellâtsiya arizasını baqmasına dair oturışta iştirak etecek edi. Qırımtatar adamını tibbiy qısımğa ketirdiler.
Advokat Lilâ Gemeci bunı "Qırım birdemligi"ne bildirdi.
Qara qış ayınıñ 16-sınıñ sabası siyasiy mabüs kamerasında bulunğanda ilk kere burnu qanadı. Onı 10 daqqa devamında toqtatamay ediler. Adam feldşer çağırmağa istedi ve oturışta iştirak etmege rede etti. Tibbiyetçi oña ilâç aşırını yaptı. Amma ilâçnıñ adını ne Şeyhaliyev, ne de qorçalayıcısı bilmey.
Bundan soñ qırımtatar adamını kamerasına oturdılar, amma 20 daqqa deamında burnu yañıdan qanamağa başladı. Yavlığı, elleri ve taban qannen basıldı. Tibbiyetçi ekinci qan aqıntısını toqtatamadı ve makemege Şeyhaliyevniñ oturışta iştirak etemegenini ayttı, çünki onı SİZOnıñ tibbiy qısmına ketirecekler.
Lilâ Gemeci añlattı ki, oturıştan üç kün evel adamnıñ başı ağıra edi. O ağrı ilâçlarını içti, amma o yardım etmedi. Keçken makeme oturışında köküs ağrısına, SİZonıñ adamğa diagnoz qoymağa ve tibbiy teşkerüv yapmağa red etkenini şikâyet etti ve
O zaman Şeyhaliyev, qalp kemligini çekkenini şeklendi. Bundan soñ SİZOda oña EKG yaptılar, faqat diagnoz qoymadılar ve ilâç yazmadılar.
2023 senesi Rustemniñ tutqanları aynı SİZOda er vaqıt sağlıq alına şikâyet etken 61 yaşındaki qırımtatar faalcisi Cemil Ğafarov vefat etti.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram ve Facebookta Suspilne Qırım haberlerine abune oluñız
