Deyerli bir senedit işğalciler, 68 yaşındaki qırımtatar Halil Mambetovnı tevqif astına tutalar. Bu sene tintüvlerden soñ qara qış ayınıñ 24-ünde onı tuttılar. O zaman altı adamnı tuttılar, olara arasında Mambetov ta edi. Rusiyede yasaqlanğan "Hizb ut-Tahir" teşkilâtında iştirak etmekte onı qaatladılar.
Siyasiy mabüsniñ apayı Lilâ Mambetova quvetçilerniñ kelgeni kün aqqında, aqayınen nasıl körüşkenini ve onıñ sağlıq alını Suspilne Qırımğa añlattı.
Sürgünlikten soñ 1989 senesi Qırımğa apayınen qayttı. Deyerli 35 sene soñ Mambetov ğuberlikte - rus Rostovdaki SİZOda buluna. Qara qış ayınıñ 24-ünde onı tuttılar.
Saba saat 4te yuqlay edik. Men maşna sesini eşittim. Ve ne olğanını tüşüne edim. Pencerege baqtım, anda ise azbarımızğa silânen keteler... Ayttılar ki, bizde nasıldır malumat kâğıtçıqlarını taptılar... Olar evge kirip, şunı soradılar: "Evde daa kim bar?". Biz ise ayttıq ki, kimse yoq, tek ekimizdir, ekimiz yaşaymız, bizim kimsemiz yoq... Bizge inanmadılar, biri 2 qatqa ketti, tekerdi. Amma o zaman bütün malümat kâğıtlarını gizlice qoydılar", — dep siyasiy mabüsniñ apayı qayd etti.
Berim ayınıñ 9-ında Aqmescitteki SİZOda aqayınen soñ kere körüşti. Endi berim ayınıñ 10-unda onı RFa etap ettiler.
"Ağarğan, sararğan... Onıñ başı aylana, yüksek basım çeke. Ana tilimizde laf etmege izin bermeyler. Birinciden, ana tilimizde laf ete bilgenlerdenmiz ve ana tilimizde uygun olmağan bir şey aytmağa qorqamız", — dep apayı, qırımtatar adamınen soñ körüşüvini hatırlata.
Qarı-qoca endi 40 senedir beraber. Ablasınıñ toyunda tanıştılar, üç qızını östirdiler. Liliya Mambeetova onkologiya ve şeker hastalığını çeke, balaları başqa yerlerde yaşaylar, bunıñ içün aqayı tek destegi edi.
Siyasiy mabüsniñ ise artroz hastalığı bar. Evde ilâçlar almaq imkânı bar edi, amma apishanede ne ilâçlar bar, ne onı tedaviyleyler. O zornen yüre. Kreml esiriniñ apayı tüşüne ki, aqayı siyasiy repressiyalar fedası oldı.
"Ealimiznen ne yapmağa istegenlerini bilmeyim... Erkeklerimiz azap çeke! Bizim halqımıznı yoq ete ekenler... Amma yoq etemeycekler! Halqımıznı yoq etemeycekler!", — dep qayd etti o.
Uquq qorçalayıcılarnıñ bilgilerine köre Qırımda eñ az eki yüz insan qanunsız olaraq tevqif etildi. Olardan 21-iniñ acele tibbiy yardımğa ihtiyacı bar. Bu cetvelde Mambetov ta bar.
Telegram, Viber ve Facebookta Suspilne Qırım haberlerine abune oluñız
