Orta küz ayınıñ 27-sinde Cuma künü işğalciler tarafından "yasaqlanğan timsallerni köstergeni" içün 14 künge tevqif etilgen ve içtimaiy ağda cenkle qarşı post sebebinden para cezasını alğan advokat Oleksiy Ladinniñ memuriy tevqif müddeti bitti.
Saat 05:40ta advokatnı tevqiften azat ettiler.
İşğal akimiyeti, Ladinni RF ordusını "itibardan tüşürmek"te ve "aşırıcılıq timsallerini tarqatmaq"ta qabaatladı.
"Tüşünmek sebepleri bar ki, menim tevqifim, advokat faaliyetim ve çalışqanım davalar, siyasiy sebepli davalarnen bağlıdır Men inanmağa isteyim ki, mana qarşı berilgen qararlar, uquqiy ceetten edalı olmay. Makemeciler onı berdiler, çünki bunı yapmağa mecbur ediler. Eger olar öz başına bu qarar berseler, men mekemecilerniñ ihtisasından qorqarım", — dep "Qırım birdemligi"ne tesfir etti.
İşğalcilerniñ Ladinni advokat litsenziyasından marum etmek istegini tefsir etkende o ayttı ki, advokatlar buna saip olmaylar, olarnıñ statusı bar. Orta küz ayınıñ 27-sinde uquqçı Advokat palatasına beyanat yazıp yollaycaq ki, oña qarşı operativ-taqiqat tedbirleri keçirildi — evi tintidli.
Tevqifi sebebinden Rostov-na-Donudaki Cenübiy bölge arbiy makemesinde Ladinniñ imaye etkeni insanlarnıñ eñ az eki makeme oturışı uzatıldı.
"Men bu qararlarnen razı degilim, olarnı qanunsız olaraq tanıyım. Eñ asğariy tarzda olarğa itiraz bildirmege planlaştırırım. Zenaatdaşlarımnen kelecek taktika ve strategiyanı azırlap areket etecekmiz. Menim kelecek işimni tefsir eterek, ayta bilirim ki, şu anda advokat olaraq öz faaliyetimni devam etecegim ve imaye etkenim insanlarnıñ aqlarını korumağa devam etecegim", — dep qayd etti o.
Oleksiy Ladin aqqında ne bilemiz
- Oleksiy Ladin, Hizb ut-Tahrir islâm fırqasına ait olmaqta Qırımda işğalciler tarafından qabaatlanğan qırımtatarlar üzerinde çoq makeme ceryanında iştirak etken qırım advokatıdır.
- Rusiyeniñ Ukrainağa tolu miqyaslı tecavuzından soñ adam, işğalciler tarafından cinaiy davalarda qabaatlanğan esir etilgen ukrain askerleri ve tutulğan vatandaşlarını qorçalay edi.
- Şu anda Rostov-na-Donuda Oleksiy Ladin, Rusiye tarafından terrakta qabaatlanğan Melitopol faalcisi Yaroslav Juknı qorçalay.
- Ekim ayınıñ 13-ünde Cuma künü işğal etilgen Qırımda ruslar, ukrain esirlerini ve siyasiy mabüslerini qorçalağan advokat Oleksiy Ladinni tuttılar.
- Tintüv vaqtında advokat Oleksiy Ladinniñ advokat sırı olğan bilgilerini alıp çıqardılar.
- Yasaqlanğan timsallerni kösterüv davasında makeme, onı 14 künge tevqif etti ve para cezasını berdi. Qırım işğal politsiyası, ukrain siyasiy mabüslerini qorçalağan ve keçenlerde tevqif etilgen advokat Oleksiy Ladinni uquq faaliyeti litsenziyasından marum etüv ricasınen hitap etti.
Telegram, Viber ve Facebookta Suspilne Qırım haberlerine abune oluñız
