Ekim ayınıñ 13-ünde Cuma künü işğal etilgen Qırımda ruslar, ukrain esirlerini ve siyasiy mabüslerini qorçalağan advokat Oleksiy Ladinni tuttılar. Birinci malümatqa köre, içtimaiy ağlardaki postu sebebinden onı “Rf SQni itibardan tüşürmek”te qabaatlaylar.
Bu dava üzerinde çalışacaq işdeşi Emil Qurbedinov, advokat tutulğanını Suspline Qırımğa haber berdi.
Qırım advokatları ve Ladinniñ ailesiniñ “Gratı”ğa añlatqanlarına köre, patlayıcını saqlamaqta qabaatlanğan Yalta sakinine qorçalayıcı tedbir aqqında oturışta iştirak etmek maqsadınen Aqmescitke ketecek edi. Ladin, Rostov-na-Donudaki Cenübiy bölge arbiy makemesindeki ukrain askerleriniñ davalarınen bağlı oturışlardan qayta edi. Aqmescitke ketken soñ advokat tutuldı.
Saat 06:30ta işğalciler, onıñ evini tintken soñ adamnı belli olmağan yerge alıpketirdiler. Başqa imayeciler onı tapmağa tırışalar.
Onıñ işdeşi Lilâ Gemeci haber berdi ki, Facebook içtimaiy ağındaki postu sebebinden Ladinni “rus ordusını itibardan tüşürmek”te qabaatlaylar.
Oleksiy Ladin aqqında ne bilemiz
- Oleksiy Ladin, Hizb ut-Tahrir islâm fırqasına ait olmaqta Qırımda işğalciler tarafından qabaatlanğan qırımtatarlar üzerinde çoq makeme ceryanında iştirak etken qırım advokatıdır.
- Rusiyeniñ Ukrainağa tolu miqyaslı tecavuzından soñ adam, işğalciler tarafından cinaiy davalarda qabaatlanğan esir etilgen ukrain askerleri ve tutulğan vatandaşlarını qorçalay edi.
- Şu anda Rostov-na-Donuda Oleksiy Ladin, Rusiye tarafından terrakta qabaatlanğan Melitopol faalcisi Yaroslav Juknı qorçalay.
Telegram, Viber ve Facebookta Suspilne Qırım haberlerine abune oluñız
