Tintüv vaqtında advokat Oleksiy Ladinniñ advokat sırı olğan bilgilerini alıp çıqardılar.
Onen körüşken soñ advokat Emil Qurbedinov ve Edem Semedlâyev, bu aqqında haber berdiler, dep Qırım birdemligi bildirdi.
Şu anda advokat, Aqmescitteki işğal 1. "Demiryol" politsiya bölügi binasındaki memuriy tevqifçiler içün mahsus tutuv yerinde buluna.
Uquqçılar, iddialaştıracaqları tutuv ve tintüv vaqtında bozulğan maddelerni muzakere ettiler. Böylece, meselâ, Aşırıcılıqqa qarşılıq merkeziniñ işçileri, advokatqa qarşı ne resmiy, ne de resmiy olmağan operativ-taqiqat tedbirlerimi keçirüv izni aldılar.
"Olar, bir qaç müim cinaiy davadan onı alıp çıqardılar. Olardan birinde munaqaşalarda iştirak etecek edi, başqalarında ise delillerni berecek edi. Oña zenaat zararlarını ketirdiler, advokat sırı olğan bilgilerini alıp çıqardılar. Bu ve başqa bozmalarnı iddialaştırmağa işteymiz. Bu soñu degil", — dep Qurbedinov tefsir etti.
Oleksiy Ladin, öz qabaatını tanımay ve tüşüne ki, ihtisasiy faaliyeti sebebinden onı taqip eteker. Ekim ayınıñ 27-sinde saba tahminen saat altıda advokat azat etilmeli.
Hatırlatamız ki, ekim ayınıñ 13-ünde Cuma künü işğal etilgen Qırımda ruslar, ukrain esirleri ve siyasiy mabüslerini qorçalağan advokat Oleksiy Ladinni tuttılar.
Oleksiy Ladin aqqında ne bilemiz
- Oleksiy Ladin, Hizb ut-Tahrir islâm fırqasına ait olmaqta Qırımda işğalciler tarafından qabaatlanğan qırımtatarlar üzerinde çoq makeme ceryanında iştirak etken qırım advokatıdır.
- Rusiyeniñ Ukrainağa tolu miqyaslı tecavuzından soñ adam, işğalciler tarafından cinaiy davalarda qabaatlanğan esir etilgen ukrain askerleri ve tutulğan vatandaşlarını qorçalay edi.
- Şu anda Rostov-na-Donuda Oleksiy Ladin, Rusiye tarafından terrakta qabaatlanğan Melitopol faalcisi Yaroslav Juknı qorçalay.
Telegram, Viber ve Facebookta Suspilne Qırım haberlerine abune oluñız
