Ukrayina Valentın Vığivskıynı nasıl qaytarmağa çalışalar

RF ukrayin siyasiy mabüsi Valentın Vığivskıynı apis müddeti bitken soñ bir yıldan ziyade sürgünlik merkezinde tuta. Babasınıñ muracaatı boyunca Ukrayina Yuqarı Şurasınıñ İnsan aqları vekâletlisi onıñ aqlarınıñ bozulğanına dair icraat açtı. Ukrayina Rusiyege onıñ qaytarılması aqqında üç kere muracaat etti, amma cevap almadı. Ayrıca dava tarafı Tış işleri nazirligi ve diplomatik müessiselernen beraber onıñ üçünci memleketler üzerinden qaytarılması içün alternativ yollarnı işledi.

Ukrayina Yuqarı Şurasınıñ İnsan aqları vekâletlisiniñ Kâtipligi Suspilne Qırımnıñ soravına cevabında bu yazıldı.

Vesiqada qayd etile ki, Vığivskıy qanunsız tayin etilgen cezanı çekken soñ azat etilmegen, Rusiye toprağındaki ecnebiylerniñ vaqtınca alıp turuv merkezlerinde qalğan ukrayinlerniñ biri ola. Ombudsmannıñ malümatına köre, böyle ameliyat ukrayin vatandaşlarınıñ qanunsız azatlıqtan marum etilüviniñ devamınıñ mehanizmlerinden biri oldı.

Ombudsman Kâtibiyetiniñ cevabında qayd etile ki, ukrayinli müstemlekeden azat etilgen soñ ecnebiylerniñ vaqtınca alıp tutuv merkezine köçürildi. Resmen böyle qararlar vesiqaları olmağanınen ya da migratsiya statusınıñ meseleleri ile esaslandırıla, amma ameliyatta olar adamnıñ belgisiz müddetke alıp tutulmasını devam ettirmege imkân bere.

«Aqiqatta mahkemeci müddetni uzatmaq aqqındaki qararlarnı avtomatik olaraq, davanıñ şartlarını şahsen talil etmeden, qabul etelerler», — dep qayd etildi cevapta.

Bundan ğayrı, Ukrayina tarafı Tış işler nazirligi ve diplomatik müesseselernen beraber qaytarmaq içün Estoniya ve Litva kibi üçünci memleketler üzerinden alternativ yollarnı işledi. Bir vaqıtta ombudsmannıñ malümatına köre, olarnıñ yerine ketirilmesi Rusiye tarafından sıñırlavlar ve manialar sebebinden qıyınlaşıtırıla.

«Rusiye tarafınıñ köterilgen meselelerge kerekli cevap bermegenini közetip, Vekil Ukrayina Tış işler nazirligi ve Ukrayinanıñ Estoniya ve Litva Cumhuriyetlerindeki elçilikleri ile beraber, bu kategoriyadaki şahıslarnı, hususan Valentın Vığivskıynı, Ukrayina Ükümetiniñ nezaretindeki topraqqa qaytarmaq içün alternativ yollarnı işledi», — dep qayd etildi soruvğa cevapta.

Kâtibiyet bildirdi ki, Vığivskıynı qaytarmaq içün Ukrayina rusiye ombudsmanı ile gumanitar alâqa kanalını qullandı. Hususan, 2025 senesi ilk küz ayınıñ 15-nde, 2026 senesi çeçek ayınıñ 9-nda ve ilk yaz ayınıñ 12-nde Ukrayina tarafı onıñ Ukrayinağa qaytması içün yardım etmesini rica etip resmiy muracaatlar yolladı, amma Rusiyeden cevap kelmedi.

O ayrıca bildirdi ki, Ukrayina Yuqarı Şurasınıñ şahsnıñ Ukrayinağa qarşı silâlı tecavuz sebebinden şahsiy azatlıqtan marum etilgeni faktını tesbit etüv eyyeti Vığivskıynı 2014 senesi ilk küz ayınıñ 18-nden berli rusiye tecavuzı sebebinden qanunsız azatlıqtan marum etilgen şahıs olaraq resmen tanıdı.

Vığivskıy özü Suspilne Qırımğa sürgünlik merkezinden telefon ile bergen intervyusında mahkemeler onıñ sürgünlik merkezinde tutulmasını muntazam uzatqanını anlattı.

«Ebet, mahkemege alıp baralar ve üç ayğa uzatalar. Ve işte soñki uzatmağa men itiraz etem. Çünki mında atta rusiye qanunlarına köre de tutunmağa bir şey bar, amma mında umumen uzun vaqıt adamlarnı tutmaylar», — dedi o.

Ayrıca siyasiy mabüs onıñ vaqiası yalıñız olmağanını qayd etti.

«Belki, Oleşkıdan soñ bir şey bizim vatandaşlarımız içün de teşkil eterler, olar böyle sürgünlik merkezlerinde. Sadece bizim merkezimizde tek altı kişi bar, amma Rusiye boyunca adam üç yüz kişi mutlaqa olur. Ve plüs men mında itiraz etem. Şimdi kassatsiya şikâyeti olacaq. Eki yönelişke baram, ve onıñ içün, ve bunıñ içün», — dep añlattı o.