Rusiye müstemlekesinden azat etilgen Qırım siyasiy mabüsi Tofik Abdulgaziyevniñ sağlığında ciddiy meseleler bar. Evge qaytqan soñ o bayıldı, qorantası ise kerekli ilâçlarnı, hususan insulinni almağa tırışqanda bürokratik manialarğa oğradı.
Siyasiy mabüsniñ apayı Aliye ictimaiy ağlardaki yazısında bunı bildirdi.
Onıñ sözlerine köre, aqayı yahşı körünse de, alı ağır olıp qala. Abdulgaziyev qıyınlıqnen yürey, daimiy baş aylanmasından, közleriniñ qaralaşmasından ve nefes almaq qıyınlığından azap çeke.
Evge qaytqanından soñki ekinci künü apay-aqay Tofikni hasta olaraq cedvelge alınmaq ve kerekli tekşerüvlerden keçmek içün hastahanelerge muracaat etmege başladı. Amma bu sırada belgilerni resmileştirüvde ve ekimlerge yazılmaqta qıyınlıqlar çıqtı.
Aliye añlattı ki, aqşamda, gece namazı vaqtında, aqayı bayıldı. O, tez yardım çağırdı ve tibbiy hadimlerge onıñ bütün tespitlerini bildirdi. Apayınıñ sözlerine köre, feldşer Abdulgaziyevniñ tibbiy belgilerini körip, STB-3 apis hastahanesinde oña berilgen insulinniñ müddeti keçken olğanını diqqatqa aldı. Aliyeniñ iddiasına köre, aqayı bunı bilmey edi ve evge qaytqan soñ da ilâçnı qullanmağa devam etken.
Bundan ğayrı, siyasiy mabüsniñ apayı bildirdi ki, şimdilik qoranta kerekli insulinni alamay. Aphanede oña añlattılar ki, preparatnı retsept boyunca ya da ekim vastasınen para ödemeden bere. Endokrinolog mesleatı içün evel terapevtke barıp, yollama almaq kerek. Aliyeniñ sözlerine köre, ekimlerge yazılmaq qıyın olğanı sebebinden bu ceryan uzana.
Aynı zamanda apayınıñ bildirgenine köre, Abdulgaziyevniñ qanındaki şeker seviyesi er kün 7-den 20-ge qadar deñişe. Kelecek aftada o, aqayını tolu tekşerüv içün onkologğa alıp barmağa planlaştıra.
Aliye şunı da yazdı ki, aqayınıñ evde bile areket etmesiniñ ne qadar qıyın olğanını körmek oña ağır. O, apis seneleri devamında aqayınıñ kerekli tedaviylevsiz, bir kişilik kamerada olğanını hatırladı.
Sağlıq alına baqmadan, Abdulgaziyev Qırımnıñ çeşit köşelerinden oña kelgen insanlarnen körüşe ve er bir musafirge diqqat ayırmağa tırışa. Apayı dualarında onı unutmamağa rica ete.
Hatırlatamız ki, 2026 senesi orta küz ayınıñ 26-nda Çelâbinskniñ Metallurgiya rayon mahkemesi onı sağlıq alı sebebinden deral azat etmek aqqında qarar çıqardı.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
