Ruslar onkologiyanen hastalanğan siyasiy mabüs Tofik Abdulgaziyevni sağlıq alı sebebinden apisten azat ettiler. Orta küz ayınıñ 26-nda Çelâbinsk Rusiye mahkemesi bu qararnı qabul etti. Orta küz ayınıñ 29-nda siyasiy mabüs işğal etilgen Qırımğa qayttı.
Suspilne Qırımğa Qırımdaki uquq qorçalayıcılar arasındaki menbalar bunı bildirdiler.
Qırımtatar Milliy Meclisiniñ Reisi Refat Çubarov Facebookta yazdı ki, o, yaşav yerini terk etmege yasaq etilgen.
2022 senesi çiçek ayında ruslar Tofik Abdulgaziyevni uydurılğan «Hizb ut-Tahrir» davasında 12 senege qanunsız şekilde mahküm ettiler. O, esirlikte 7 sene 7 ay keçirdi — 2019 senesi saban ayınıñ 27-nden, işğalli quvetçiler onı tutqan künden.
Rusiye mahkemesi evel siyasiy mabüsniñ ağır sağlıq alı sebebinden azat etilmesi aqqındaki ricasını qaldırğan edi. İlk küz ayınıñ 22-sine planlaştırılğan oturışnı orta küz ayınıñ 26-sına köçürdiler.
2026 senesi kiçik ayınıñ 26-ndan başlap qırımtatarnıñ qorçalav tarafı eyyet tibbiy netice berdi, oña köre Tofik Abdulgaziyevniñ tedaviylevni toqtatqan hastalıqlar cedveline kirgen, şu cümleden onkologik, hastalığı bar. Aynı künü şu vesiqa mahkemege yollandı. Amma o zaman onı azat etüv meselesi çezilmedi, bunıñ yerine siyasiy mabüsni yañıdan tibbiy tekşerüvge yolladılar.
Tek 2026 senesi oraq ayınıñ 29-nda ekimler eyyeti yañıdan tasdıqladı ki, Tofik Abdulgaziyev apiste tutulmağa uyğun olmağan hastalıqtan azap çeke.
«Uquq qorçalayıcılar bu vaqıtnı Rusiye akimiyetiniñ, Abdulgaziyevniñ ayatına vastasız ölüm telükesi doğurğan, dayanılmaq şaraitlerni añlı yaratması olaraq tanıylar. Azat etilüvniñ bu sekiz aylıq uzatılması neticesinde ne olğanını şimdilik tam bilmeymiz, o zaman o, kerekli tıbbiy yardımnı vaqtında ala bilir edi. Eñ muimi şimdi — Tofik Abdulgaziyev Qırımda (bildigimizge köre, anda oña yaşav yerini terk etmek yasaq) kerekli tibbiy yardım ala bilsin ve onıñ ayatı ve sağlığı qurtarıla bilsin», — dep yazdı Çubarov ve qorantasını qavuşqanınen hayırladı.
Hatırlatamız ki, Tofik Abdulgaziyevniñ bir qaç ağır hastalığı bar. Konsilium netice çıqarmasına köre, onda baş beyiniñ yaman şişigi — glioblastoması bar, bunıñ sebebinden o, tamamen körme qabiliyetini coydı. Bundan ğayrı, küçlü baş ağırısı, büyrek taşları ve bayılma alâmetlerinen azap çeke.
Başqa diagnozlar arasında — köküs içindeki limfa tüyümleriniñ zarar körüvinen tarqalğan aqciger veremi, qanda kritik yüksek şeker seviyesi, eki taraflı aqciger yanğısı ve gidrotoraks, hronik yürek yetmezligi ve bağlayıcı toquma displaziyası sindromı bar. Bundan ğayrı, ağır anemiyası, büyrek taşları ve hronik gastriti bar.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
