İşğalciler, UNESCO tarafından Telükede olğan Dünya mirası obyektleri cedveline kirsetilgen Tavriya Hersonesiniñ territoriyasında qanunsız qazmalarnı devam ete. Bu sene berim ayınıñ 24-nden başlap, rusiyeliler anda qanunsız şekilde daa bir qazma yaptılar ve Suriye keramikasınıñ parçalarını ve Bizanstan kelgen suvlanğan keramikanı taptılar.
Ekim ayınıñ 31-nde TASS Rusiye devlet agentligi bildire, dep Aqyar devlet universitetiniñ işğal etilgen Bizans ve Qara deñiz yanındaki Tarih ve arheologiya institutınıñ müdir muavini Sergiy Boçarov haber ete.
'Suriye keramikasınıñ elementleri tapıldı, o, mavı renknen farqlana. Bizans ve Qara deñizniñ şimaliy yalısında, biz, mavı renk bergen kobalt boyaçını bilmey edik. Ve bu eşyalar Mamluk, Mısır ve Suriye devletleriniñ mahsulatlarıdır. Suriye yalısından ketirilgen — bu, fosforescent kibi, parlaq, mavi renkli, hususiy şımartılğan keramika. Suvlanğan keramikağa kelgende, suvuq — orta asırlarda tarqalğan suvlı şımartma, bu, bizans istisalıdır, ihtimal, Konstantinopolis,' — o, dedi.
Bundan da ğayrı, işğalciler qadimiy devirde yazılğan qırmızı şekilli keramika parçalarını taptılar.
Hersones-Tavriya territoriyasında qanunsız qazma işleri berim ayınıñ 24-nde başlandı ve ekim ayına qadar devam etti. Bu vaqıt içinde topraqnıñ üçte bir qısmını teşkerdiler, qalğan qısmını ise beş yıl içinde teşkermege isteyler. 2027 senesi bu yerni eki buçuq ay devamında tedqiq etecekler.
Hatırlatamız, qural ayınıñ 23-nde UNESCOnıñ Dünya mirası komiteti 48-inci sessiyasında «Hersones Tavriyasınıñ qadimiy şeeri ve onıñ horı» Dünya mirası obyektini Telükede olğan Dünya mirası obyektleri cedveline kirsetmege qarar aldı.
'Bu qararğa qol tutamız. Vaqtınca Rusiye tarafından işğal etilgen Ukrayinanıñ Qırımında yerleşken bu obyekt Rusiye işğalci akimiyeti tarafından zarar ve viran etilüv telükesi altında qala«, — dep o vaqıt Ukrayina Tış işler nazirliginiñ yolbaşçısı Andrey Sıbiğa qayd etti.
Qarar, halqara toplulıqnı vaqtınca işğal etilgen Qırımdan kelgen medeniy degerliklerniñ qanunsız ticaretini toqtatmaq içün işbirlikni quvetleştirmege çağıra.
İşğal etilgen yarımadada Rusiyeniñ belgilengen bozuvları bu qararnıñ esası oldı: qanunsız arheologik qazma işleri, abideniñ territoriyasında ve onıñ qoruma zonalarında büyük qurucılıq, arheologik kontekstniñ yoq etilmesi ve medeniy degerliklerniñ qanunsız avuştırılması, dep añlattılar Ukrayina prezidentiniñ Qırım MC temsilciliginde añlattılar.
Bundan ğayrı, UNESCO Qırımnıñ diger medeniy miras obyektleriniñ qoruvını temin etmege çağırdı: Bağçasaraydaki Han sarayı, Qırım Gotiya mağara şeerleri, Qırım astrofizik observatoriyası ve Sudaq qalesi.
Hersones Tavriya — Şimaliy Qara deñiz yalısındaki qadimiy yunan meskün yeri. VI asırda qadimiy yunanlar tarafından qurulğan şeer, regionnıñ müim siyasiy, iqtisadiy ve medeniy merkezi oldı. 2013 senesi arheologik abide UNESCO Dünya mirası cedveline kirsetildi. Hersones Tavriya ve onıñ horları aman-aman bütün Aqyarnıñ territoriyasını qaplap alalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
