2024 senesi saban ayından berli Çelâbinskteki 3-nci mahsus verem hastahanesinde tutulğan Qırım siyasiy mabüsi Tofik Abdulgaziyev bir kişilik kameradan tedaviylev bölügine avuştırıldı. Bunıñnen beraber, onıñ sağlığı fenalaşa: areket etmege qıyın, ayrette qala, üzgün ola ve şeker seviyesi birden deñişe. Adamnıñ beyin kanseri de bar.
Oraq ayınıñ 14-nde onıñ apayı Aliye Abdulgaziyeva Facebookta bunı bildirdi.
"Men evel yazğan edim ki, Tofik tedaviylenüv ve ameliyattan red etti ve apishane binasına avuştırılması aqqında ariza yazdı. Hastahanede qoranta körüşüvleri berilmey. Sağlığı fena olğanına baqmadan, o böyle qarar aldı, çünki "bir daa körüşimiz olamaya bilir". Adamnıñ aytqanına köre, ariza berilgen soñ, oña vesiqaları baqılğanını bildirdiler. Apis müddeti bitkeni içün onı müstemlekege avuştırmaq meselesi baqıla. O vaqıt, ne vaqıt ve qayerge avuştırılacağından pek qasevetlengen edim. Tofik nasıl etaplarğa dayanır. Onıñ alı ep beterleşe", — dep ayttı o.
Qırımtatar qadınnıñ aytqanına köre, siyasiy mabüs aynı hastahanede qala, amma onı başqa bölükke — tedaviylev bölügine avuştırdılar. Anda o, diger mabüslernen beraber buluna, yürmege ve insanlarnen qonuşmağa imkânı bar.
Oraq ayınıñ 30-nda tekrar teşkerüv keçirilecek, o, miyinde tavuq yımırtası büyükliginde bir şişik bar olğanını tasdıqlay bile. Daa evel ekimler biopsiya yapmağa teklif etken ediler, amma Abdulgaziyev qafa terpanatsiyasından vazgeçken edi. Hastalığı tasdıqlansa, onı sağlıq vaziyetinen azat etile bilir.
"Yazıq ki, ya da teessüf ki, Tofikniñ azat etilmesi içün bütün sebepleir bar. Bu serbestlikniñ fiyatı — ayat", — dep qayd etti onıñ apayı.
Oraq ayınıñ 27-nde advokatnıñ siyasiy mabüsni azat etüv muracaatınen bağlı nevbetteki mahkeme oturışı keçirilecek. Aliye Abdulgaziyevanıñ aytqanına köre, onıñ büyük ümütleri yoq, çünki evelki mahkemeler neticesiz bitken edi.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
