İşğal etilgen Qırımdan Rusiye tarafından qanunsız olaraq azatlıqtan marum etilgen eñ az 40 insannıñ ağır hastalığı tasdıqlandı. Ukrayina Yuqarı Şurasınıñ Qırım MC ve Sevastopol (Aqyar) şeeriniñ sakinleriniñ aqları vekâletli temsilcisi Elvin Kadırovnıñ aytqanına köre, olardan beşi ayat ve ölüm sıñırında buluna. Qırımtatarlarnıñ qanunsız taqip etüvi yarımadada «davalar»nıñ 60%-ini teşkil ete.
Orta küz ayınıñ 28-nde o, Şimaliy Makedoniya Parlamentiniñ mebusları, Baş nazirniñ birinci muavini — Şimaliy Makedoniya Avropa meseleleri naziri Bekim Sali ile iş körüşüvleri vaqtında Facebookta bunı bildirdi.
«Şimdilik eñ az 40 kişi ağır hastalıqlarnen şahsiy azatlıqtan qanunsız şekilde marum etildi. Bu hastalıqlarnıñ çoqusı, Avropa cezalandıruv (apishabe) qaidelerine köre, apishanede tutmağa imkân bermeycek hastalıqlar cedveline kire. Eñ az beş insan ayat ve ölüm arasında buluna, olar Tofik Abdulgaziyev, Ğalına Dovğopola, İrına Danılovıç, Amet Süleymanov ve Lenur Halilov», — dep qayd etti Elvin Kadırov.
Bundan da ğayrı, Türkiyeniñ Şimaliy Makedoniyadaki Fevqulâde ve Vekâletli Elçisi Fatih Ulusoy ile körüşkende o, Rusiye Federatsiyası tarafından vaqtınca işğal etilgen Qırımda insan aqlarınıñ bozuluvı, hususan qırımtatarlarnıñ sistematik taqip etilüvi meselelerini muzakere etti.
«Ukrayina Yuqarı Şurasınıñ insan aqları vekâletlisiniñ ofisiniñ malümatına köre, qırımtatarlarnıñ taqip etilüvi yarımadada taqip etilgenlerniñ 60%-ini teşkil ete, bu ise Ukrayina tamır halqına qarşı sistematik ve ayırımlı olğanını köstere», — dep bildirdi memur.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
