Zelenokumsktaki 7-nci Rusiye müstemlekesinde tibbiy yardım kösterilmegeni sebebinden bir qulağından eşitme qabiliyetini coyğan vatandaş jurnalisti, Qırım siyasiy mabüsi İrına Danılovıç hastahanege alınıp olamadı. Er kün saba müstemlekede onıñ alını betergen yüksek sesli muzıka çalına. Tibbiyet bölügine muracaat etken soñ, memuriyet tedaviylevni red etti ve «sessiz yer» olaraq ŞİZOcezalandıruv izolâtorı teklif etti.
Orta küz ayınıñ 21-nde aqşam Qırımtatar Resurs Merkeziniñ idarecisi Zarema Bariyeva Facebookta bunı bildirdi.
Onıñ aytqanına köre, dört künden soñ siyasiy mabüs hastahanege kirmege tırıştı, anda o, fizikiy meseleleri ve devamlı ruhiy basqı sebebinden hastahanege yatqızılmağa rica etti. İrına bir qulağından eşitme qabiliyetini tedaviylengen otit ve yanğı sebebinden coydı, müstemlekede ise er kün saba erkenden yüksek sesli muzıka çalına, bu ise onıñ vaziyetini daa beter ete.
Amma müstemleke memuriyeti tedaviylev yerine onı hastahanege yatqızmağa razı olmadı. Tibbiyet bölüginiñ hadimleri siyasiy mabüslerge tek ceza izolâtorı teklif ete bilecek «tınç yer» olğanını bildirdiler.
«Böyle bir reaktsiya şunı köstere ki, Rusiye müstemlekesiniñ reberligi insan aqlarını körmemezlikke ura, tibbiy yardım kösterilmemesi ve dayanılmaz tutuv şaraitini Qırım siyasiy mabüsine qarşı daa ziyade basqı ve azap aleti olaraq qullana», — dep qayd etti Bariyeva.
Qorantası, onıñ taqdiri, Rusiye esirliginde elâk olğan jurnalist Viktoriya Roşçınağa beñzer bir şey ola bileceginden qorqa.
Daa evel onıñ qardaşı Olğa Novıtska bildirdi ki, Danıloviçnıñ yüksek sesli muzıkağa yazılı şikâyetleri netice bermey: cevap olaraq o, bozuvlar tapılmağanı aqqında resmiy cevap ala. Telefonlar ve muracaatlar cevaplanmay.
Hatırlatamız ki, işğalli «mahkeme» tarafından qanunsız sürette 7 yılğa mahküm etilgen Qırım vatandaş jurnalisti İrına Danılovıç endi dört yıldır Rusiye müstemlekesinde kerekli tibbiy yardımsız buluna. Kiçik ayda qadınnıñ soy-sopları bildirdiler ki, defalarca muracaat etkenine baqmadan, oña uzun müddet devamında tibbiy yardım kösterilmedi ve kerekli ilâclar berilmedi.
İrına Danılovıç aqqında ne bilemiz
Saban ayınıñ 29-ında vaqtınca işğal etilgen Qırımda işten evge qaytqanda İrına Danılovıç ğayıp oldı. Aynı kün Kefe yanında Oy Quyu köyündeki evi tintildi. Anda ana-babaları yaşağan ediler, evini tintkende işğal quvetçileri cep telefonı ve tehnikasını alıp çıqardılar.
Bir qaç ay devamında tibbiy yardım talap etken soñ saban ayınıñ 21-inde açlıq çekmege ilân etti — izolâtorda, ayrıca keçken sene üküm çıqarılğan soñ onıñ sağlığı pek zayıfladı.
Cinaiy davasınıñ bilgilerinen tanış olıp bitirmek içün qanunsız "Kefe şeer makemesi"ne ketkende Danılovıç bayıldı. Bundan ğayrı, azaplar sebebinden açlıq ilân eter.
Çiçek ayınıñ 6-sında jurnalist açlıq bitirdi, çünki onı teşkermek ve tedaviylemek içün onı Aqamescitteki SİZOdan hastahanege alıp ketirmege söz berdiler.
Bozarğan aynıñ 29-ında işğal etilgen Qırım Yuqarı makemesi içtimaiy jurnalist ve faalci İrına Danılovıçnıñ ükümini deñiştirdi. Bundan evel patlayıcı alet saqlağanı sebebinden yedi senege malüm etildi. Apellâtsiya makemesiniñ qararına köre ceza müddeti bir ayğa azladılar.
Keçken sene boş ayda bildirildi ki, Danılovıç sanitar olmağan şartlarda buluna ve ihtiyac duyğanına baqmadan onı tedaviylemeyler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
