Ukrayinada 2014 senesi ruslarğa Qırımdaki ukrayin arbiy obyektlerini ve devlet müessiselerini zapt etmege yardım etken «Sevastopol öz-özüni mudafaa etüvi» qanunsız silâlı birleşmesiniñ ştab yolbaşçısı 12 yılğa mahküm etildi. Uquq qorçalayıcı organlardan menbalarnıñ malümatına köre, söz Oleğ Roslâkov aqqında kete. Mahkeme ğıyabiy şekilde qarar çıqardı.
Orta küz ayınıñ 26-nda Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığınıñ saytında bu aqqında haber etildi.
«Qırım Muhtar Cumhuriyeti ve Sevastopol (Aqyar — terciman) şeeri prokurorları qabaatlağanları içün "Sevastopol öz-özüni mudafaa etüvi" qanunsız silâlı birleşmesiniñ ştabınıñ yolbaşçısı 12 yılğa mahküm etildi. Mahkeme onı qanunda qayd etilmegen silâlı birleşmede iştirak etüvde, devlet hainliginde, Ukrayina topraq bütünligi ve toqunılmazlığına zarar ketirüvde qabaatladı (Ukrayina CQniñ 260-ıncı maddesiniñ 4-ünci qısmı, 111-inci maddesiniñ 1-inci qısmı, 110-ıncı maddesiniñ 2-nci qısmı)», — dep bildirdi prokurorlıq.
Qırım işğal etilmeden evel Oleğ Roslâkov Sevastopolda (Aqyarda) yerleşken Rusiye Federatsiyası Qara deñiz flotunıñ 810-ncı brigadasınıñ deñiz piyade polkunıñ komandanı edi.
«2014 senesi kiçik ayda o, Rusiyege qoltutqan quvetlerniñ tarafını tutıp, duşman kontrolindeki "Sevastopol öz-özüni mudafaa etüvi" QSBniñ ştabınıñ yolbaşçılığına keçti. Öz cenk tecribesinden faydalanıp, adam şahsen terkibine namzetlerni saylay, planlaştıra ve erkânında olğanlarnıñ areketlerini idare ete edi. Onıñ reberligi altında "öz-özüni mudafaaçılar" USQniñ Arbiy-deñiz quvetleri komandanlığı ştabını, "Belbek" ava limanını, prokurorlıq, militsiya ve diger devlet müessiseleriniñ binalarını zapt ettiler», — dep añlattı prokurorlıq.
Tahqiqatnıñ malümatına köre, onıñ emirleri ile silâlı birleşmeniñ diger azaları şeer soqaqlarında qaravul ete, öz başına blok noqtalarını qura, vesiqalarnı teşkere, maşinalarnı tinteler ve yarımada işğaline qarşı çıqqan yerli sakinlerni «iç tertibiniñ qoruvı» adı altında tuta ediler.
«Bundan da ğayrı, ştab yolbaşçısı, qanunsız referendumnıñ keçirilmesi arfesinde işğalcilerden silâ alğan edi, onıñ yardımınen saylav bölüklerinde "saylav" ketişatını nezaret etmek kerek edi. İşğalli rejimge sadıqlığı içün "öz-özüni mudafaacı" "Qırım ve Sevastopolnıñ azat etilmesi içün" medalini aldı», — qoştılar uquq qorçalayıcılar.
Qırım MC ve Sevastopol (Aqyar) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları («ğıyabiy ükümler») neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
