Halq mebusı Tamila Taşeva Parlamentlerara birliginiñ (PAB) Assambleyasınıñ umumiy munaqaşalarında Qırımnı işğalden azat etmek ve Qırım sakinlerini qaytarmaq kerekligini qayd etti. O, qırımtatarlarğa qarşı repressiyalarnı hatırlattı ve Rusiyeniñ VİETvaqtınca işğal etilgen topraqlarda qanunsız «parlament saylavları»nı keçirgenini takbih etti. Taşevanıñ çıqışından soñ Rusiye temsilcileri narazılıq bildirdiler.
Orta küz ayınıñ 8-nde Inter-Parliamentary Union (IPU) YouTube kanalında yayınlanğan umumiy munaqaşa vaqtında bunı bildirdi.
Halq mebusı şunı bildirdi ki, qırımtatar halqı içün devlet esnaslarına qoşulmaq nazariy bir şey degil, bu öz menligi, kimligi ve öz toprağında serbest yaşamaq aqqı meselesidir.
«Men qırımtatar ve musulmanım. Men Özbekistanda doğdım, çünki qorantam, bütün qırımtatar halqı kibi, 1944 senesi Stalin rejimi tarafından Qırımdan sürgün etilgen edi. Tek on yıldan soñ evimizge qaytıp oldıq. Amma 2014 senesi Rusiye Qırımnı işğal etti, ve daa bir nesil repressiya ve qorquğa oğradı. Lâyıq idarecilik devlet farqlılıqnı telüke olaraq degil de, öz küçüniñ bir qısmı olaraq qabul etkende başlana. Ukrayina bu yolnı sayladı», — dep qayd etti o.
Mebus hatırlattı ki, 2021 senesi Ukrayina qırımtatarlarnı tamır halqı olaraq tanıdı ve olarnıñ menligini ve temsil aqqını qorçalay.
Aynı zamanda Qırım işğal etilgen soñ Rusiye yarımadağa repressiyalarnı ketirdi. Mebusnıñ aytqanına köre, işğal başlağanından berli 548 insan siyasiy apishanege tüşti ya da siyasiy sebeplerden taqip etildi, olarnıñ arasında 281 qırımtatar bar.
Bundan ğayrı, Taşeva Rusiyeniñ VİETda «saylavları»nı keçirgenini tenqit etip, işğal suverenitetni yaratmağanını, qanunsız rey berüv ise ukrayin toprağını ruslaştırıp olamağanını qayd etti.
«Qırım — bugün ve yarın Ukrayina olacaq. Şunıñ içün sizni ilk qış aynıñ 7-nde Halqara Qırım platformasınıñ Londondaki beşinci parlament sammitinde iştirak etmege davet etem. Bizim maqsadımız tek Qırımnı Ukrayinağa qaytarmaq degil. Bizim maqsadımız — Qırımğa azatlıq qaytarmaq ve Qırımnı ev kibi körgen insanlarğa qaytarmaqtır», — dep qayd etti o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
