İşğalciler «Qırım Yuqarı mahkemesi»ne 50 yaşındaki Perekop rayonınıñ sakinine qarşı «devlet hainligi» maddesine istinaden cinaiy dava açtılar.
Qırım «prokurorlığı» bunı bildirdi, dep haber etti orta küz ayınıñ 6-nda «Novosti Krım» Rusiye teşviqat haber agentligi.
Tahqiqatnıñ versiyasına köre, o, Ukratina havfsızlıq hızmetine yarımadada Rusiye arbiy obyektleri aqqında malümat berdi.
Prokurorlıqnıñ bildirgenine köre, adam «mahsus arbiy operatsiya»nıñ — Ukrayinanıñ Rusiye tarafından işğal etilmesiniñ — keçirilmesine qarşı çıqtı. Keçken sene ilk küz ayında o, ava mudafaası sistemalarınıñ yerleştirilüvi aqqında malümat toplamağa yardım etti.
«O, alğan malümatnı Ukrayina havfsızlıq hızmeti qullanğan açıq kanalğa messencerlerden birine yolladı», — dep qayd etildi haberde.
Hatırlatamız ki, Rusiye, «terrorizm», «aşırıcılıq», «casuslıq» ve «devlet hainligi» qabaatlavlarını qullanıp, Ukrayina vatandaşlarını sistematik şekilde taqip ete. Taqip mehanizmleri, ukrayinlerni Rusiyeniñ «aşırıcılar ve terroristler» cedveline kirsetüv ve esli-başlı insanlarğa basqı aqqında QRMniñ idarecisi Zarema Bariyeva tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
