Qırım siyasiy mabüsi Abdulmecit Seitumerov (Seitumer) Rusiye apishanesinde yazğan mektübinde qırımtatarlarğa qarşı repressiyalar tek mabüslerni degil de, olarnıñ qorantalarını da cezalandırğanını bildirdi. Yıllar devamında qorantalarınıñ destegi olmadan yaşamaq mecburlar, balalar ise ana-babasız ösip, ruhiy zarar köreler.
Orta küz ayınıñ 3-nde Facebookta ömür arqadaşı Amina Seitumerova derc etken qorantasına yazğan mektübinde o, bunı yazdı.
«Bir kişige berilgen müddet, şu andan itibaren, onıñ bütün ailesine, yaqınlarına ve sevgelerine berilgen müddetke çevirile. Er bir aile — ayrı bir tahir, ayrı bir facia. Bu tarihlerde an közyaşları, qadınnıñ sabırı, balalarnıñ sağınıçı, ağrı, ümüt ve iman bar», — dep qayd etti Seitumerov.
Onıñ qayd etkenine köre, şimdi Qırımda yüzlernen qorantalar böyle sınavlarnen qarşılaşa. Qırımtatar şunı da qoştı ki, böyle ikâyelerniñ er biri ağrı, közyaşlar, ümüt ve tuvğanlarnıñ evge qaytqanına işanç ile tolu.
Abdulmecit Seitumerov «Hizb ut-Tahrir» davasınıñ beşinci Bağçasaray gruppasınıñ mabüsi ola. Rusiye quvetçileri onı 2023 senesi arman ayında qırımtatarlarnıñ evlerinde keçirilgen tintüvlerden soñ tuttılar. Onı Rusiyede yasaq etilgen, amma Ukrayinada serbest faaliyet köstergen teşkilâtqa alâqası bar olğanında qabaatlaylar. Rusiye prokorlığı oña 17 yıllıq apis cezasını talap ete, üç yılnı apishanede keçirecek.
Seitumeronıñ mektübiniñ qırımtatar latin urufatına çevirilgen metni:
«Es-selâmü aleyküm, millet!
Bütün müşkülliklerge baqmay, yaşamaqnı devam etken, dini, medeniyeti ve tili içün muqavemet etken milletim.
Allahu Taalâ muqaddes Quranda böyle buyura:
«Biz sizni bir az qorqu, açlıq, mal-mülk, canlar ve meyvelerden kemitmeknen sınaycamız. Sabır etkenlerni sevindir». («Baqara» süresi, 155-ayat)
Er bir insan oz yoluda Allah tarafından taqdir etilgen sınavlardan keçmekte. Bu böyle olğan, böyle ola ve Qıyamet kününe qadar böyle devam etecek. O künde er kes bu dünyada yapqan amellerinden cevap berecek.
Soñki yıllarda olğan vaqialar neticesinde çoq ale uzun müddetke oz aileniñ başından ve qoruyıcından ayrı qala.
Qadın aqayından, baba-anasından ayırılğan oğulnı, oğulnı baba-anasından, aileniññ qqazancısından ayırıp, çoq insannı büyük müşküllikler içine taşlaylar.
Bu sınav tek apıshanelerde bulunğanlarnıñ degil, olarnıñ bütün yaqınlarınıñ da sınavıdır. Bu sınav, uzun müddet devam etken bir mücadelege aylanıp, bütün ailelerni ağır bir yaşayışqa mecbur ete.
Babalarından ayrı qalğan balalar ösmekte. Lâkin olar baba sevgisini, baba qayğısın, yardımın ve nasihatini yanlarında duymay öseler. Yanlarında babalarınıñ sevgisini, şevqatnı ve nasihatini körmeyler.
Balalıq devirinde insannıñ psihikası, terbiyesi ve cemiyetke munasebeti teşekkül ete. Bu devirde babanıñ yoqluğı bala içün ömür boyu iz qaldıracaq ağır bir yaradır.
Kim balağa añlatacaq: «Ne içün sevgen babañ yañında degil? Ne içün o uzaqta? Ne mana onı demir artına yaqalap yatqızdılar? Eger o yamanlıq yapmağan, aqsine, insanlarğa yardım etken olsa, ne içün o tutuqlı?»
Başqa balalarıñ tolu ailelerini körgen balağa ne demek kerek? Ne içün o özüniñ sevgen babasından ayrı qaldı? Nege o yılına tek bir kere babasını körmek mümkün olğan bir yaşayışqa mecbur?
Ya qadınlarğa nasıl olmaqta?
Olarnıñ ömüzlerine bütün mesüliyet yüklene: balalarnıñ terbiyesi, oquvı, aş-suvı, evniñ qayğısı ve para qazanmaq.
Bir qaç balası olğan qadınlar iş tapmağa, ev işlerini yapmağa, balalarnı terbiye etmege ve bütün aile meselelerini oz başına çezmege mecbur qala.
Aile içün birlikte çezilmesi kerek olğan meseleler endi tolusınen ana ve qadınnıñ ömüzlerine yüklene.
Bugün Qırımda böyle vaziyetke tüşken ailelerniñ miqdar yüzlerce.
Ve er birisi içün, yaqınına berilgen müddet, özüniñ de müddetine çevrile.
‼BİR KİŞİGE BERİLGEN MÜDDET, ŞU ANDAN İTİBAREN, ONIÑ BÜTÜN AİLESİNE, YAQINLARINA VE SEVGENLERİNE BERİLGEN MÜDDETKE ÇEVRİLE.
Bu — yüzlerce ve biñlerce yaqınnıñ, horantalarıñın qaderidir. Er bir aile bu ağır yükni oz başından keçirmege mecbur.
Er bir aile — ayrı bir tarih, ayrı bir facia. Bu tarihlerde ana közyaşları, qadınnıñ sabırı, balalarnıñ sağınıçı, ağrı, ümüt ve iman bar.
İnsan nasıl olaraq oz dinine köre yaşamaq istegeni, medeniyetini ve tilini saqlamaq arzu etkeni içün zindanda ola bile?
Rabbimden yalvaram: O, er bir müşkül alda olğan horantalarğa tez zamanda ğururlu haber bersin! Er bir ailege sabır ve quvvet bersin. Yaqın vaqıtta er bir aile oz yaqınınıñ evine qaytuvı ile sevinsin.
Allah bütün tutqunlarımızğa azatlıq, ailelerine sabır, yüreklerine quvvet bersin.
Amin.
Abdulmecit Seitumer.»
Hatırlatamız ki, Rostov-na-Donudaki Cenübiy bölge arbiy mahkemesinde prokuror, «Hizb ut-Tahrir» sahte davasında qırımtatar Abdulmecit Seitumerov içün 17 yıl apis cezasını talap ete, olardan üç yılını apiste keçirmek kerek olacaq. «Beşinci Bağçasaray gruppası davası»nıñ diger mabüsleri — Remzi Nimetulayev, Amethan Umerov, Ruslan Asanov, Eldar Yakubov ve Seidamet Mustafayev — 17 yıldan 19 yılğa qadar apis cezasını talap ete.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2023 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
2024 senesi orta küz ayınıñ 21-nde Rostov-na-Donu Cenübiy bölgesiniñ arbiy makemesi, yañı deliller olmağanına baqmadan, Abdulmecit Seitumerov ve beşinci Bağçasaray gruppasınıñ başqa mabüsleriniñ apis müddetini daa eki ayğa uzattı.
2025 senesi orta küz ayında rusiye mahkemesi, SİZOda gigyenasızlıq ve hastaqlılarınıñ kirgenleşkeni aqqında delillerge baqmadan, bu gruppanıñ altı qırımtatar mabüsiniñ apis müddetini 2026 senesi kiçik aynıñ 23-üne qadar devam ettirdi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
