Qırımda işğalciler yarımadanıñ energetik obyektlerine dronlarnıñ ücüm etkenini bildirdiler. Bazı meskün yerler elektriksiz qaldı, Qırımnıñ bütün toprağında ise qullanuv sıñırlavları çalışa. «Qırım yeli» nezaret resursı bu gece Yañı Qapu, Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Yevpatoriya (Saq) rayonlarında patlavlar ve yarıqsızlıqlar aqqında haber etti.
Orta küz ayınıñ 2-nde Qırımnıñ energetik obyektlerine yapılğan dron ücümleri aqqında «Krımenergo» işğalli teşkilâtınıñ saytında haber etildi.
«Qırımnıñ energetik obyektleri kene duşman uçucısız ücümine oğradı. Şeerlerniñ bir qısmı elektriksiz qaldı. İçtimaiy obyektler yedek elektrik teminatı şemalarında çalışalar. Yarımada boyunca elektrik energiyasınıñ qullanuvı sıñırlana. Elektrik naqil hatları ve (ya da) elektrik ağınıñ donatmaları tezden söndürildi, bu, energiya rayonındaki vaziyetke bağlıdır: tamir işleri içün/ağdaki yükni çekmek içün. Elektrik energiyasınıñ tez vaqıtta qullanıcılarğa berilmesi içün bütün tedbirler alına», — dep qayd etildi haberde.
«Qırım yeli» monitoring resursınıñ malümatına köre, o gece Yañı Qapuda (Krasnoperekopsk) patlavlar yüz berdi, bundan soñ elektrikler yoq oldı. Simferopol (Aqmescit) şeerinde ve Yevpatoriya (Saq) rayonlarında yarıqsızlıqlar aqqında haber etildi.
Bundan da ğayrı, onıñ malümatına köre, gece Rusiye arbiy tehnikası tren vokzalınıñ yanındaki Yañı Qapuda zarar kördi.
Haber neşir etilmeden evel ukrayin askerleri bu malümatnı izaatlamadılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
