2026 senesiniñ soñuna qadar ruslar «skit altını» aqqında daa 40 sergini keçirmege planlaştıralar. Bu tedbirlerde Rusiye temsilcileri oña Rusiyeniñ mülkiyet aqqı aqqında teşviqat tarqatalar.
TASS Rusiye devlet agentligi bu aqqında yazdı.
«Rusiye arbiy-tarihiy cemiyetinden zenaatdaşlarımnıñ issesini ayrıca qayd etmek isteyim, olar Qırım kollektsiyasınıñ hususiyetlerine bağışlanğan muhteşem, manalı, pek açıq sergini azırladılar. Müzey cemiyeti de çette qalmadı, şimdilik Rusiyeniñ aman-aman 40 müzeyi sergi materiallarına esaslanıp, eñ qısqa müddet içinde hırsızlanğan eşyalarğa bağışlanğan sergini ve olarnı qaytaruv işiniñ aspektlerini azırlamağa azır olğanını bildirdi», —dedi Rusiye Medeniyet nazirliginiñ müzey ve tsirk sanatınıñ destek bölüginiñ müdiri İvan Lıkoşın ve ilâve etti ki, bu leyhalarnıñ büyük bir qısmı yılnıñ soñuna qadar bütün Rusiyede keniş seyircilerge taqdim etilecek.
Hatırlatamız ki, bundan evel bu kibi sergiler Moskva, Vaşington, Meksika, Poloniya ve Felemenkte keçirilgen edi.
580-den ziyade arheologik eşyalardan ibaret bir kollektsiya aqqında söz kete. Olarnıñ arasında silâ, zırh, bezek, ev eşyaları ve milâttan evel birinci asırdan milâttan soñ üçünci asırğa qadar qullanılğan altın eşyalar bar. Qırımnıñ Rusiye işğaline qadar bu eşyalar Qırımdaki dört ukrayin müzeyinde saqlanıla edi. 2013 senesi kollektsiya Amsterdamdaki Allard Pearson müzeyinde numayışqa berildi. 2014 senesi Qırım Rusiye tarafından işğal etilgen soñ artefaktlar Felemenkte qaldı. 2023 senesi Felemenk Yuqarı mahkemesi kollektsiyanı Ukrayinağa bermege qarar aldı. Mahkeme onıñ Ukrayina devlet müzey fonduna aitligini tasdıqladı.
«İstilâcı devlet ukrayin artefaktlarını "Rusiye mirası" olaraq köstermege ve çetelde Qırım tarihı aqqında deñiştirilgen tasavurnı şekillendirmege tırışa. Bu kibi Rusiye fotoresim sergileri diger memleketlerde de keçirile. Hususan, Meksikada, Poloniyada ve Felemenkte. Böylece, Rusiyeniñ "Rusiye hazineleri" aqqında iddiaları ne kollektsiyanıñ peyda oluv tarihına, ne de halqara mahkeme qararına uya. Ukrayina müzeyleri bu medeniy degerliklerniñ qanuniy saipleridir. Rusiye elçihanesi Felemenkniñ qararını "medeniy mirasnıñ siyasetleştirüvi" olaraq tanıdı ve Moskvanıñ kollektsiyanı qaytarmağa tırışacağını bildirdi», — dey Ukrayina müessisesi.
Ukrayina Prezidentiniñ Qırım Muhtar Cumhuriyetindeki Temsilciligi Ukrayina Tış işler nazirligine muracaat etip, Rusiyeniñ tışarıda böyle sergiler keçirgenini ve Rusiye teşviqat laflarınıñ tarqaluvına cevap bermek kerekligini soradı.
«Bu haber kampaniyasınıñ bir qısmı olmamağa çağıramız: böyle sergilerni körmemezlikke urmağa, olarğa meydanlar bermemege ve tarqatılmasına yardım etmemege çağıramız. Qırımnıñ medeniy mirası — ukrayindir, ve Rusiye onı işğalni aqlamaq ve ukrayin tarihını saipleşmek içün qullanıp olamay», — dey Temsilcilik.
Bu mesele, Finlandiya medeniyet müessiseleriniñ temsilcileri ile körüşüvde de muzakere etildi.
«Körüşüv vaqtında vaqtınca işğal etilgen Qırımdaki vaziyet, insan aqlarınıñ bozuluvı ve taqip etilüvi muzakere etildi. "Qırım altını" aqqında Rusiye teşviqat sergilerine, Qırımnıñ medeniy mirasınıñ Rusiye yatırım programmalarında qullanılmasına ve yarımadanıñ medeniy mirasınıñ saip etilmesine ve ukrayin kimliginiñ sıqıştırılmasına doğrultılğan ikâyelerniñ darqatılmasına ayrı diqqat ayırıldı», — dep bildirdi Temsilcilik.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
