AQŞdan ğayrı, Rusiye «Rusiye artefaktları» olaraq taqdim etken «skit altını» aqqında teşviqiy foto-sergilerni Meksika, Poloniya ve Felemenkte de açtı.
Arman ayınıñ 21-nde Ukrayina Prezidentiniñ Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerindeki Temsilcligi öz saytında bu aqqında malümat berdi.
Evel biz bunı añlatqan edik ki, beñzer sergiler Rusiyeniñ Vaşingtondaki elçiliginde ve Moskvada açıldı. Vaşingtonda, hususan, sergiden fotoresimler Rusiye elçiliginiñ qorasında yerleştirildi.
Söz, 580den ziyade arheologik eşyadan ibaret olğan bir kolleksiya aqqında yürsetile. Olarnıñ arasında — silâ, zırh, ilvanlar, ev eşyaları, em de milâttan evel I asır — milâttan soñki III asırğa ait altın eşyalar bar. Rusiye Qırımnı işğal etmeden evel bu eşyalar Qırımdaki dört ukrayin muzeyinde saqlanğan edi. 2013 senesi kolleksiya Amsterdamdaki Allard Pirson muzeyine sergige berildi. Rusiye 2014 senesi Qırımnı işğal etken soñ, artefaktlar Felemenkte qaldı. 2023 senesi Felemenk Yuqarı mahkemesi kolleksiyanı Ukrayinağa bermege qararnı etti. Mahkeme, onıñ Ukrayina Devlet Muzey fonduna ait olğanını tasdıqladı.
«İstilâcı devlet, ukrayin artefaktlarını "Rusiye mirası" olaraq taqdim etmege ve tışarıda Qırım tarihı aqqında bozulğan bir tasavvurnı yaratmağa tırışa. Beñzer Rusiye foto-sergileri diger memleketlerde de keçirile. Hususan, Meksika, Poloniya ve Felemenkte. Böylece, Rusiyeniñ "Rusiye hazineleri" aqqındaki iddiaları, em kolleksiyanıñ kelip çıqış ikâyesine, em de halqara mahkeme qararlarına uyğun kelmey. Ukrayin muzeyleri bu medeniy degerlerniñ qanuniy saipleridir. Rusiye elçiligi Felemenk qararını sözde "medeniy mirasnıñ siyasetleştirilmesi" olaraq tanıdı ve Moskvanıñ kolleksiyanı qaytarmaq içün küreşini devam etecegini bildirdi», — dep ayttı Ukrayina Temsilciligi.
Ukrayina Prezidentiniñ Qırım Muhtar Cumhuriyetindeki Temsilcligi, Rusiyeniñ tışarıda böyle sergiler keçirgeni ve Rusiye teşviqat ikâyeleriniñ tarqatılmasına cevap bermek zarureti aqqında Ukrayina Tış İşler nazirligine muracaat etti.
«Bu haber kampaniyasınıñ bir qısmı olmamağa çağıramız: beñzer sergilerni körmemezlikke uruñız, olarğa yer bermemege ve olarnıñ tarqatılmasına yardım etmemege çağıramız. Qırımnıñ medeniy mirası — ukrayindir, ve Rusiye onı işğalni aqlamaq ve ukrayin tarihını menimsemek içün qullanamaz», — dep ayttı Temsilcilik.
"Skit altını" aqqında ne bilemiz
"Qırım hazineleri" ya da "skit altını" içün Ukraina on sene devamında Felemenkte yarımadanıñ işğalli müzeylerinen dava etti, çünki 2014 senesi Rusiye Qırımnı zapt etkende eksponatlar Amsterdamda sergide buluna edi.
2023 senesi bozarğan aynıñ 9-nda, aman-aman 10 senelik makeme davalarından soñ, Felemenkniñ Yuqarı makemesi Allard Pierson müzeyini "Qırım - Qara deñizdeki altın ada" sergisinden eksponatlarnı Ukraina Milliy tarih müzeyine bermege mecbur etti.
"Skif altını" 2023 senesi boş ayda Felemenkten Ukrainağa qayttı. Kıyivge yarımadanıñ dört müzeyinde "Qırım: Qara deñizniñ altını ve sırları" sergisinde taqdim etilgen artefaktlar berildi.
2694 kilogramm qadimiy hazinelerni yük maşnasınen Kıyiv-Peçersk Lavrınıñ toprağına alıp ketirdiler. Degerliklerniñ teşkerüvini Kyiv gümrükçileri Ukraina Milliy müzeyi hazinesinde keçirmege kerek ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
