Arman ayınıñ 23-nde işğal etilgen Yaltanıñ Autka ve Darsan rayonında, orman yanğını devam ete. Bu müddet devamında işğalli «qurtarıcılar» onı yoq etemaediler. Bugün, tolu transmissiyalı yoldan tış ketken maşnalar ve dağ mototsiklerine saip olğan göñüllilerni qıdıralar.
Arman ayınıñ 23-nde işğalli Yalta «Tek nevbetçi-dispetçer hızmeti» bu aqqında malümat bere.
«Autka/Darsan rayonında landşaft (orman) yanğınını söndürüv işleri devam ete. Fizikiy quvetli ve sağlam, 18 yaşından büyük, tolu transmissiyalı yoldan tış ketken maşnalar ve dağ mototsikllerine saip olğan erkekler kerek», — dep qayd etildi haberde.
Hatırlatamız ki, Yaltada dağlıq yerde orman yanğını arman ayınıñ 19-ndan sabadan berli devam ete. Başta işğalli qurtarıcılar bildirgen ediler ki, yanğın alanı 3 gektarğa yete, arman ayınıñ 20-nda ise belli oldı ki, yanğın alanı ciddiy şekilde arttı — 10 gektarğa qadar, ve Qırımda yanğınçılarğa yardım etecek göñüllilerni qıdırmağa başladılar.
Arman ayınıñ 21-nde, işğalcilerniñ sözlerine köre, küçlü yel sebebinden yanğın 50 gektar alanğa qadar tez şekilde yayıldı. Arman ayınıñ 22-nde işğalciler yanğın alanı aqqında endi malümat bermey ediler.
Yanğınnıñ sebepleri aqqında da iç bir şey qayd etilmey. RİA «Novosti Krıma»nıñ arman ayınıñ 19-nda haberinde qayd etilgen edi ki, yanğın qıyın irişilebilir bir yerde çıqtı, yanğınçılar dağlıq yerden ayaqnen ketmege mecbur qalalar, tehnikanı yaqlaştırmaq mümkün degil. Arman ayınıñ 20-ndan başlap ise ruslar yanğınnı söndürmek içün aviatsiyanı celp ettiler.
«Qırım yeli» Telegram kanalı bildirgen edi ki, bu yanğın, Yaltada arman ayınıñ 19-nda ast stantsiyalarğa yapılğan ücüm vaqtında Rusiye ava mudafaasınıñ çalışması neticesinde çıqtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
